經濟學習誌主題文章結集 | Econ記者

各位應該唔會有留意瑞士將會係6月10日進行一次公投，其中一個題目係貨幣及銀行制度嘅大改革，個改革方案名為Sovereign Money（先譯為主權貨幣）。 咩係Sovereign Money？ 好簡單咁講，Sovereign Money計劃要求所有流動存款不再直接由銀行管有，而是經銀行再存入央行。銀行係同一時間，就會從央行取回由央行發行嘅貨幣，即係Sovereign Money，並且可以用呢批貨幣黎借錢出去俾其他客戶。 同傳統有咩唔同？ 要睇睇有咩咁大改變，就要用傳統嘅銀行與貨幣關係作對比。係中學經濟學教科書就已經有教到銀行係存款同借貸嘅角色，以下不妨回顧一下。 先講下基本嘅設定，首先我地會假設央行會製定一個最低存款儲備率，以下嘅例子中我地會假設個儲備率係10%。即係，當銀行收到100元嘅存款之後，就需要最少將將10元留低並存入央行，以作為儲備。咁其餘90元可以用黎做咩？銀行當然可以將錢留埋黎做多餘儲備，又或者銀行可以將呢90元多餘儲備借出去， 基礎嘅分析會指出，客戶B係銀行借出90元之後，佢可以直接將錢存入另一間銀行，又或者用90元買野/投資，將錢交予商人C，然後假設商人C（或者將錢再傳俾蛋散D-Z都好）會將錢存入銀行。 若果我地用整個銀行體系計，最初存入左100元之後，銀行創造了90元貸款，而這90元最終又會流入返銀行體系成為新存款；換言之，最初的100元存款變出了190元存款。當然，銀行收到這90元存款之後，9元要留低作儲備，其餘81元可以再借出去，並可能會再重新流入銀行體系成為新存款。 如果這個存款創造貸款，貸款創造新存款嘅過程一直推到盡，原來個100元將可以變成1000元的存款（計法係100*1/10%），即係創造左900元嘅新存款及貸款。這900元新貸款/存款其實在經濟學上都算係貨幣（M1或以上），亦即是100元的基礎貨幣（M0）最終「無中生有」變出（最多）10倍貨幣；或者，可以講呢個銀行體系有最高10倍嘅Money Multiplier（貨幣乘數）。 要記住，就算係上述嘅論述，呢個「存款貸款創造貨幣」嘅實際效果，亦要視乎每次銀行留低嘅多餘儲備有幾多，同貸款者會唔會以非存款嘅方法存放手上現金，所以10倍之數只係講最多可以創造幾多貨幣，而唔係實際推測貨幣增長嘅工具。 上述制度有咩問題？ 上述嘅「存款（貸款）創造貨幣」機制，是建基於Fractional Reserve System（部份儲備機制），即是上述假設嘅10%最低存款儲備率。但Fractional Reserve 最大嘅問題，係由於大量存款係「無中生有」，銀行因此有擠提嘅風險。 繼續用上面1000元總存款嘅例子。1000元總存款背後，其實銀行只係有100元儲備支持；即係如果存戶A（第一個存入100元個位）及商人C同時提款，銀行就需要190元黎找數，但由於銀行只有100元現金，其實係無法即時應付呢個現金需求，咁就會出現擠提（Bank Run）嘅情況，銀行流動性不足，無法即時應付提款需求，咁就可能令銀行倒閉（呢個係簡化左嘅假設），而大部份存戶都拎唔返佢地嘅存款。 呢個極簡化嘅例子係想示範擠提風險，令銀行體系有潛在不穩定嘅特質。特別係當存戶對銀行（體系）失去信心，同時大量提款的話，就可能令銀行體系崩潰，產生金融及經濟危機。 Sovereign Money有咩分別？ Sovereign Money嘅設計就係希望回應這個風險；要記得，每一元嘅存款都會存入央行，銀行就算倒閉，仍然可以由將存款退回予存戶；另一方面，由於銀行每作一元嘅貸款，都要先向央行提取一元嘅Sovereign Money，這個新制下銀行不再有「創造」貨幣之能。 即係話，係Sovereign Money制度下，所有貨幣創造功能都會回歸央行之手，銀行嘅角色會由「創造貨幣」，變成集中從事管理存款現金，與批核及借出現金兩個中介人服務。沒有擠提風險，亦沒沒有銀行過度信貸問題，金融體系將會變得更穩定，呢個就係提倡Sovereign Money公投嘅NGO Monetary Modernisation Association (MoMo）所提出嘅好處。 問題係⋯⋯係咪咁就可以消滅金融危機嘅風險？ 下集再講。 https://econreporter.com/2018/06/77974/%e7%91%9e%e5%a3%ab%e5%98%85100%e8%b2%a8%e5%b9%a3%e5%88%b6%e5%ba%a6%e5%a4%a7%e5%85%ac%e6%8a%95-%e7%9c%9f%e4%bf%82%e9%a0%90%e9%98%b2%e5%88%b0%e9%87%91%e8%9e%8d%e5%8d%b1%e6%a9%9f%ef%bc%9f/

經濟學習誌

聯儲局係咩黎？

PPI — 其實呢個數據反映咩野？

英國嘅「勞動參與率」

美國加拿大住屋通漲計法大不同

Median CPI 同 Median PCE 嘅...

英倫銀行解說：加息租金升定跌？

Trade Wars Are Class Wars...

瑞士嘅100%貨幣制度大...

實質利率—Real In...

咩係「工業化太早結束症」...

勞動參與率下降同金融海嘯...

歐洲壯年男女唔工作嘅原因...

55歲以上人士的勞動參與...

美國經濟

美國就業報告：4月非農就業仍見顯著增長

英國經濟

英國春季預算 – 工黨政府與OBR沒完沒了嘅fi...

加拿大經濟

加拿大4月失業率：6.9%

經濟學

European Monetary Fund? 咩黎架?

PPI — 其實呢個數據反映咩野？

係人都識嘅Prisoner Dilemma