係近年歐元區經濟改革議程中,成立European Monetary Fund(EMF)嘅建議最令我感興趣。點解歐元區諸國會考慮成立一個歐盟版嘅IMF呢?而歐盟版嘅IMF又係咩意思呢?

首先要知道ESM係咩…

目前歐洲主要討論嘅EMF框架,都係想用呢個新機制黎取替歐債危機年代建立嘅European Stability Mechanism(ESM)。ESM係2012年10月成立,而ESM參與國則為全數歐元成員國。ESM嘅主要用途有三個:

一,借錢俾成員國政府作緊急經濟援助之用,但同時會向受助國家提出援助條件;
二,為合資格嘅成員國提供預備信貨(Precautionary credit lines),供危機時之用;
三,直接向成員國內嘅銀行注資,解決流動性不足可能帶來嘅銀行體系危機。

以下係ESM網站上簡介旗下現有嘅貨款援助工具,目前只曾應用過成員國有條件援助貨款,及向銀行注資兩項工具:

咁近年ESM最明顯嘅工作,就係向希臘提供援助資金,並且鼓勵及審視希臘執行一系列經濟改革,以達成援助條件。

咁EMF又有咩唔同?

目前歐盟及唔少成員國都希望將ESM嘅個機制強化,理論上就係希望將佢變成EMF,令歐元區可以一方有ECB提供貨幣政策同金融監管,而EMF就提供緊急財政援助,同埋更具系統性嘅財政及經濟改革經推動者。

當然,目前EMF只係草擬初期,所以只有改革大方向,實際細節欠奉,甚至連係咪叫European Monetary Fund都唔係全無爭議。

若果按照歐盟委員會主席Jean Cluade Juncker係去年提出嘅改革路綫圖建議,EMF會繼續ESM嘅援助角色,援助資金規模將會維持係ESM嘅5000億歐元。

但一個重要嘅改革建議,就係加速EMF決議嘅程序,每項政策只係需要董事會(即係歐元區各成員國)85%票數通過。目前ESM援助需要全數成員同意先可獲通過,令到ESM援助往往有極多爭議,更有可能未能及時通過足夠援助嘅問題。因此,建議中嘅EMF框架就希望減少個別成員國獨自阻撓援助計劃嘅情況。

另外,由於ESM董事會其實亦係Eurogroup,即由全部成員國嘅財相聯合組成,到底係EMF之下係會維持呢個管理框架,亦係討論議題。

EMF建立嘅另一個重點,就係EMF將會成為歐洲嘅Single Resolution Fund(SRF)嘅支持資金來源。SRF係歐盟銀行聯盟下一個重要機制,就係預先定下各間主要銀行出現經營問題時如何安然有序咁關閉左間銀行。由於要關閉一間銀行時,將會產生一系列嘅Write-off,建議中嘅EMF就可以提供緊急資金去減低相關嘅金融衝擊。

德法嘅《Meseberg Declaration》

Embed from Getty Images

係上個星期,德法兩國亦都就歐元區經濟改革達成左基共識,公佈左《Meseberg Declaration》。係德法共識中,EMF嘅個字眼並無出現,但兩國就同意左要改革ESM,除左同意ESM要改名之外,亦同意要加強ESM係製定同改革援助計劃嘅角色,但亦重申往後ESM(或者EMF?)嘅援助計劃都係要包含經濟改革在內,唔可以無條件借錢俾成員國。而德法兩國都同意ESM要擔起作為SRF資金來源嘅角色。

基本上,係ESM/EMF呢個議題上,德法同埋歐盟委員會嘅大方向相同。但今個星期嘅歐盟峰會,就要同所有成員國討論實行細節,之後相信可以更明確知道ESM/EMF往後嘅角色。

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous articleCasey Mulligan嘅《Side Effects and Complications》
Next article邊個城市嘅人要係返工時間睇世界盃…?
Econ記者網站新聞團隊(絕大部份時間其實得一個人主理)

留言區

This site uses Akismet to reduce spam. Learn how your comment data is processed.