近日唔少加拿大新聞台都有呢類似嘅報道：明明加國央行都開口話左6月減息有可能，點解按息反而升左嘅？
- 當然，有留意財經新聞嘅各位當然唔難估到原因：雖然加國減息嘅預期增加，但同時聯儲局可能因為通漲放緩進度未如理想而要推遲減息速度，令美國長綫孳息上升。
- 例如美國嘅五年期國債孳息，年頭不過3.93厘，去到周四升至4.7%。
講五年期，除左因為佢嘅走勢同十年期好接近，亦係因為想同加國嘅五年期國債孳息比較
- 美國按掲好多時同香港一樣一造就三十年﹐而加國係二十至三十年期但就每五年續一次之類。
- 加國五年國債孳息就係一個主導本地五年定息按揭走向嘅重要指標
- 上圖可以，雖然近月加國央行減息嘅預期上升，但五年孳息其實係跟住美國國債升左上去。
始終，債市整體都係以美息作為指標，而美國息率亦左右全球嘅流動性走向，加債孳息無可避免會跟住美債走。
一個有趣嘅討論就係呢個走勢會點樣影響加國央行減息嘅考量。 要記住，加拿大統計局採用嘅CPI計法，會喺住屋成本直接計入消費者住係自置物業時直接需要支付嘅開支，例如物業稅同按揭利息。
- 呢個做法同美國採用嘅Owners’ Equivalent Rent（OER 或自住等值租金）唔同
理論上，加國央行減息就會可以拉低按息，從而幫助通漲降温。但上述嘅情況都見到，按息可能係跟住美國嘅孳息而非加央行利率走，咁加央行應該點做？
- 一個可能當然係減息減快啲，希望可以抵銷美國孳息上升嘅效果。
但要留意，係加拿大CPI嘅自住開支入面，除左按息仲有一個以做Homeowners’ replacement cost嘅項目
- 呢個數字係計樓宇拆舊嘅價值，實上就係反映到樓價升幅嘅數據。
- Replacement cost嘅權重係5.47%，比按息嘅3.8%更重。
如果急速減息，會唔會再次令樓市急升，從而又再通漲有上升壓力呢？
我覺得呢個係相當有趣嘅課題，會再研究下。
