最後更新日： 2026年09月05日
經過左一連三個月嘅正增長，加拿大嘅就業人數喺8月終於要跌，按月減少左4.2萬。
同一時間個失業率無變，繼續維持喺6.4%。
就業人口減4.17萬
用全職及兼職分開就業變幅條數，會見到絕大部分嘅減幅都係黎自全職（-3.59萬），兼職只佔5800個嘅減幅。
用行業分佈睇，就見到個減幅主要集中喺商業及樓宇管理業，單係呢個行業就見到近兩萬個減幅，不過其實呢個跌幅直接被製造業嘅增長完全抵消左； 不過因為就業跌嘅行業數理較多（11個跌對5個升），夾夾埋埋就跌左4萬個職位有多。
失業率6.4%
失業率點解唔升？ 今次嘅原因好簡單，就係就業人數減少嘅同時，勞動人口都減少左。喺8月，勞動人口減少左3.68萬人，失業人口就升左4800人。
用返中學經濟書嘅計法，失業率升定跌就睇勞動人口嘅百分比變幅，同失業人口嘅百分比變幅邊個大啲。咁失業人口係升左0.3%而勞動人口就跌0.16%，咁失業率咪應該升囉？係嘅，所以其實失業率係由6.417%升到6.449%，足足升左0.032百分點！ （係啊，差0.001個百分點條數就會變成6.5%。）
廣告
