最新數據——2026年第三季
美國第三季嘅GDP增長回復強勢，按季增長高達3.4%（經年化）。
如果簡單用Expenditure Approach去理解，主要增長動力就係一如既往咁係美國消費者！
- PCE（個人消費開支）對今季增長率嘅貢獻高達2.5個百分點。
- 之後就到投資，貢獻左近1.7個百分點嘅增長。
咁投資呢回事，就當然要同AI呢個主題扣上。喺多間科企出盡全力喺美國本土興建Data Center（數據中心），呢個過程就產生左好多資本開支，好多呢啲開支都計入GDP中嘅投資，帶動呢個高速嘅增長。
但我地要留意嘅呢啲投資背後有入口抵銷效應（Import Offsets）嘅問題……
全文分析 → 美國第三季GDP—AI投資巨浪？ 抵銷左囉 （2026年11月1日刊）
有關美國GDP你需要知道嘅係……
Expenditure Approach
一般嘅美國GDP數據分析，都係以教科書有教嘅Expenditure Approach （即開支角度）作為基礎。
呢個方法最為人熟悉嘅就係所謂嘅GDP算式，即係GDP = C + I + G + X – M：
- C 喺美國就係PCE（Personal consumption expenditures），個人消費開支，即係唔係攻府或者企業嘅消費；
- I 就係私人投資，英文全名喺美國係Gross private domestic investment；
- G 就係政府開支，喺BEA系統個英文全名為Government consumption expenditures and gross investment，當中係包括左政府嘅消費同埋投資開支，亦包括左聯邦政府與及州及地方政府嘅開支。
- X 就係出口（包括貨品及服務）； M 就係入口（都係包括貨品及服務）。
- NX 就係平時常用嘅淨出口或Net Export，即X減M嘅寫法。
年化數據
美國對GDP增長率嘅表達方式，一般係會將增長率「年化」，即係會將一個季度嘅增長率複合四次，當全年四季都係同一個增長率去講一年嘅增長率有幾快。
- 假如某一季個增長率為0.5%，咁就用(1.005^4 – 1) = 0.02，即係大約2%嘅年化增長率。
- 其他國家例如英國同埋歐元區都係唔會用年化數字，所以要留意英國嘅0.5%（無年化）其實就係美國嘅2%（經年化）。
數據修訂時間表
美國BEA（即Bureau of Economic Analysis）會分三次公佈美國季度GDP增長
- 喺季度完結後嘅第一個月底（即係第一季完結後喺4月底），BEA就會公佈所謂嘅數據初值（Advance Estimate）。
- 大約一個月後就會出第一次修訂數字（Second Estimate）； 喺呢個階段BEA同時會刊出用企業盈利（即係教科書入面嘅Income approach）計嘅GDP，可以用收入嘅角度睇到企業盈利、薪酬等對GDP嘅貢獻。
- 再一個後BEA就會公佈第二次修訂（Third Estimate），亦為所謂嘅終值；同時BEA亦會公佈用所謂嘅Value-added Approach（BEA稱之為Production Approach）計嘅GDP，咁就可以睇到各個行業對GDP嘅貢獻。
延伸知識
聯儲局常提及嘅PDFP
PDFP 全稱為Private Domestic Final Purchases（又或者喺BEA系統入面嘅正確名稱係Final sales to private domestic purchasers）。
- 計法上就係好簡單咁將個人消費（PCE，亦即GDP算式上嘅C）加上私人投資（GDP算式上嘅I；但要留意係唔計政府嘅投資）開支；
- 因為呢個係計本土經濟入面所有嘅私人市場開支﹐即無政府開支、無庫存同無計國際貿易嘅影響，近年成為左聯儲局常用嘅美國本土私人需求嘅量度方法，集中睇消費同投資嘅增長有無減弱。
GDPNow—美國嘅GDP Nowcasting工具
GDPNow 係一個由 Atlanta 聯儲銀行整理及發佈嘅美國GDP Nowcasting 工具。Nowcasting 就即係「實時」咁用月度數據去估算GDP喺該季嘅增長率。
- 因為BEA（Bureau of Economic Analysis）編制GDP時，其實會用其他經濟指據（例如零售銷售、CPI、PPI、PCE數據）作為基礎，而呢啲數據唔少都係月度公佈，研究員就仿照當局計GDP嘅方法，用已經公佈嘅月度數字去估返個GDP數字出黎。
- 一季有三個月，季初時有啲數據未公佈，更有好多直情係未發生。呢啲情況下，個模型嘅做法就會用現有數據放入數據模型先去估未公佈/未發生嘅數字，當數字出左就即時補返啲真實數字入去。亦因此呢啲Nowcasting 季初會無咁準，但去到季尾就相對準好多。
GDPNow相關分析
- 美國第三季經濟增長睇黎唔差喎 (2024年10月18日刊)
- GDPNow預視美國經濟正步入衰退？ （2025年3月6日刊）
- 美國就快衰退？ 原來係GDPNow壞左先真! （2025年3月9日刊）
