Econ記者 September, 2018刊出嘅文章

近一年幾，美國嘅孳息曲綫趨平而且愈黎愈接近反轉，係市場上一個關注重點。 長債孳息理論上係由一連串嘅未來短債孳息推演出黎，咁係正常嘅經濟環境下通脹，傾向會維持穩定或者穩步上揚，咁就會令未來嘅短債（名義）息率應該會較現水平相約，或者愈黎愈高；再加上市場要補償持債人預先買入長債所承受嘅風險，因此長債息率正路黎講都係要高過短債。美國史上多次衰退前都會錄得孳息曲綫反轉嘅情況，市場擔心孳息曲綫一反轉，就即係衰退就快來臨。 一般而言，市場討論嘅孳息曲綫都係用名義利率計算，而簡化指標就係10年期同2年期國債孳息息差。 St. Louis聯儲銀行副總裁David Andolfatto最新一篇網誌討論呢個比較少人注意嘅學術角度 --- 實質利率計嘅孳息曲綫反轉係咪都係衰退先兆？個理論上解釋係點講架呢？ Andolfatto指實質利率某程度係反映消費或經濟實質增長率，一年期嘅實質利率正數就大致顯示預期經濟增長都係正數，十年期實質利率就大約反映預期未來十年嘅平均增長。如果用呢個角度睇，實質利率嘅孳息曲綫右向上（例如十年實質利率減一年實質利率係正數），就顯示預期經濟增長會加速；換言之，反轉左嘅實質利率孳息曲綫就係預視經濟增長減速。 再深一層嘅分析，可以用Friedman嘅恆常收入假說（Permanent Income Hypothesis）黎理解。恆常收入假說指，人作消費決定時主要考慮佢對成世人嘅總收入（/財富）嘅預期；即係現時嘅收入（嘅改變）唔係消費決定首要決策因素，未來可預期嘅收入（嘅改變）先係最重要嘅因素。 如果我預期未來嘅收入增長加快，咁我就可能增長現時嘅消費；但邊度黎錢增加消費？一係借錢，一係減少儲蓄，呢兩個行為都會令借貸市場嘅資金供應減少，實質利率就會有上升嘅趨勢。當然，一個人儲少左錢就唔會令市場實質利率上升嘅，但若然所有人對預期經濟增長加速，同時增加消費，就可以令實質利率上升。放返落孳息曲綫框架，長債息率高過短債息率就係經濟入面嘅人普遍相信增長率會加速；反轉嘅話，就係增長速度預期會減慢。 但減慢唔係一定衰退喎？Andolfatto指出，增長減慢可以有兩個情景：一係將經濟由高增長推去低增長，二係將經濟由低增長推去衰退。以下呢張圖就係10年同1年期實質孳息息差（藍綫），同人均實質消費增長率嘅圖（橙綫），可以見到實質孳息曲綫反轉有能力預測衰退，但有時只係預視消費增長放緩。 網誌全文： http://andolfatto.blogspot.com/2018/09/what-is-yield-curve-forecasting.html

Monthly Archives: September 2018

實質利率孳息曲綫反轉又點...

咩係央行貨幣互換協議- ...

貨幣政策與Macropr...

唔同國家嘅人對投資風險睇...

Brexit令英國人少左...

咩係Market Mon...

美國經濟

美國9月CPI通脹: 3%

英國經濟

英國通脹9月維持3.8%不變

加拿大經濟

加拿大7月錄疫情以黎最大就業減幅

經濟學

聯儲局係咩黎架？— 追蹤美國貨幣政策最新動態

恆滯理論 — Secular Stagnation

Repo – 回購 – 其實係咩黎？