經濟關鍵字

你可能諗緊「實質利率（Real Interest Rate）都要解？」我當然覺得個基本概念好多讀者都識，但各位讀者又不妨睇下我有無能力係個簡單概念都俾到啲新資訊你。 基本概念 日常係銀行、報章上睇到嘅利率，例如按息利率、聯儲局成日加加減減嘅Fed Fund Rate或者你銀行定期存款收到嘅利率，技術上嘅講法呢啲都係名義利率（Nominal Interest rate）。係經濟學術語上，所有以貨幣價格計算嘅收入及回報都算是Nominal；而同Nominal相對嘅概念就係實質（Real）。 用返利率做例子，利率係你借錢出去嘅回報，但如果你只係睇金錢價格上嘅回報就可能有誤差。假設呢個經濟體只係蕉一件貨品，一隻蕉一蚊，換言之你借出一百蚊係同你借出一百隻蕉係相同嘅。又假設你借出一百蚊嘅利率回報係10厘，即係一年後可以收返110蚊，但係咪又等於你一年後可以買到110隻蕉？咁就視乎蕉嘅價格有無改變啦。 如果一年後蕉加價至1.1元，換言之你上年借出去嘅係一百隻蕉，到今年你收返嘅其實都只係一百隻蕉，咁用蕉計嘅話你收到嘅利率係幾多呢？無錯，係零。 可以見到，用金錢計嘅話（Nominal）利率係10厘，但用蕉計嘅話（Real）利率係零。咁係咩令到Nominal同Real出現分離啊？就係蕉加價，亦即係通脹（Inflation）。 所以我地可以將上面嘅推論整理，成為以下呢條簡式： 名義利率 實質利率 + 通脹 深啲但都係幾基本概念 如果你想講得有型啲嘅話，就可以用Fisher Equation黎稱呼上述嘅簡式，因為呢個簡式概念係由貨幣經濟學大師Irving Fisher普及開來。 當然，Fisher探討嘅版本其實係較有理論內容嘅方向，要知道係經濟學傳統嘅一個概念，係實質利率主要由經濟體嘅整體供求同效率決定，所以係短綫通常假設不變，特別係唔會受到貨幣供應嘅影響。正因如此，當你借錢俾人時要決定將收取嘅（名義）利率時，假設左實質利率唔變，咁你要考慮嘅主要係呢一年嘅通脹係幾多；即係你要睇嘅唔係上一年嘅通脹率，而係對未來一年嘅通脹預期。所以Fisher Equation就變成： 實質利率 名義利率 - 通脹預期 即係假如你大約知道經濟嘅實質利率係咩水平，咁你睇住個名義利率就可以推算到個通脹預期啦。 一個現代金融嘅應用，就係通脹保障債券（例如美國嘅TIPS），正因為TIPS嘅利息回報係會按住通脹率黎調整，因此我地可以用TIPS嘅價格（同利率）黎估計出金融市場認為個實質利率應該係幾多。然後，我地只要將同等年期一般債券利率，減去TIPS嘅（實質）利率，就可以推算到市場嘅通脹預期。 上圖紅綫就係10年期美國國債（名義）利率，而藍綫就係10年期TIPS（實質）利率，咁兩者相距咪就係市場對未來10年嘅（年）通脹預期。 基本概念就係上述呢啲，再進一層我地可以講下自然利率概念。 甚麼是自然利率 自然利率亦即是整個經濟體的均衡實質利率（Equilibrium Real Interest rate），當現實上出現的實質利率與這理論上的均衡水平一致，整體經濟就會達致全民就業，而通脹亦可維持在穩定的低水平。基礎經濟學一般都會假設，只有實質利率可以長綫影響到經濟運作，貨幣供應同埋通脹只可以有短期嘅影響力，因此係討論自然利率或者均衡利率時，講嘅都會係實質利率。甚至我地可以咁講，自然利率正正就係我地上述講嘅短期不變，全經濟只有一個嘅實質利率水平。 放到去聯儲局政策，由於聯儲局理事現時集體嘅長綫Fed Fund Rate（名義利率黎嘅）預估係2.9厘，而同時聯儲局有個長綫通脹目標2%，你放呢兩個數字入返去Fisher Equation，你就會見到聯儲局目前嘅實質利率/自然利率估算，係0.9厘。 扮高深嘅概念 再（扮）高深一啲，上述講過實質利率係由經濟總供求及效率決定，可以假設實質利利率係中綫都係頗穩定嘅；依家一齊望住上面個Fisher Equation，我問你如果實質利率係穩定不變，而央行上調（名義）利率水平的話，通脹（預期）會有咩改變？無錯，係呢個解讀之下，我地會見到一個同「經濟常識」相反嘅情況，就係加息會令通脹（預期）上升! 呢個係近五六年一個新興嘅貨幣經濟學派Neo-Fisherian嘅研究方向，要記住呢個係一個極具爭議嘅新興理論，唔少主流學者都認為Neo-Fisherian係倒轉因果，將「高通脹迫使央行加息」解讀成「高息容許高通脹」，但一個有趣嘅學術問題就係主流宏觀模型都有Fisher Equation作基礎，令到Neo-Fisherian嘅推論係模型上非常可行，並帶進現實世界應用嘅討論。 例如其中一位相當活躍推廣Neo-Fisherian理論嘅知名學者Stephen Williamson最近就係佢網誌上，提及聯儲局加息後通脹持續上升，及土耳其嘅情況都可能係Neo-Fisherian嘅例子，有興趣深研嘅讀者可以一睇。

經濟關鍵字

Standing Repo Facility 係咩...

央行貨幣政策體制下一個「進化」 — 「需求主導」嘅...

聯儲局係咩黎？ | 有關美國中央銀行嘅入門資料

PPI — 其實呢個數據反映咩野？

Median CPI 同 Median PCE 嘅...

點解聯儲局將個RRR減到零？

歐央行嘅TLTRO係咩黎？

實質利率—Real In...

咩係「工業化太早結束症」...

信息不對稱與Moral ...

甚麼是Lemon Mar...

甚麼是自然利率—Natu...

甚麼是Prospect ...

美國經濟

聯儲局主席2025年Jackson Hole演說 ...

英國經濟

英國7月CPI通脹率：3.8%

加拿大經濟

加拿大7月錄疫情以黎最大就業減幅

經濟學

全球經濟失衡 — Global Imbalances — 如何「引發」金融海嘯？

孳息曲綫反轉又如何？

Coco Bonds