美國嘅就業報告繼續「估你唔到」嘅走勢，當市場都已經估緊個升幅唔會太弱，可以有6.5萬個非農職位增長嘅時候，出到黎係16.5萬個。
同時間之前嗰兩個月嘅非農數字都上調左： 8月上調左5.3萬，去到18.6萬，而9月亦修正去到六萬，較之前上次公佈高左3.1萬。即係兩個月嘅職位增長一共多左8.4萬個。
失業率同一時間係微微下跌，由4.18%降到去4.14%。
呢個仲要係喺勞動參與率回升（61.8至61.9）背景下情況，因為BLS（Bureau of Labor Statistics）嘅估算下，失業人數喺10月係減少左4.1萬。
就算係平均時薪，雖然用12個月變幅（3.12%）睇都仲係繼續減速中，但如果轉去用三個月平均睇，會見到個升幅係加速返，升返去3.88% （將三個月嘅升幅年化左嘅）。要知道呢個數字喺7月低見2.48%。
