Eugenio Cerutti 相關內容

Hysteresis，以我所知是由物理學借來的用字，下文我會以「衰退後遺症」（或簡單「後遺症」）代為稱之。重量級宏觀經濟學家Olivier Blanchard及Larry Summers，加上IMF的首席經濟師研究助理Eugenio Cerutti 係2015年為IMF合著一份工作論文《Inflation and Activity – Two Explorations and their Monetary Policy Implications》 ，其中一個論題就係衰退後遺症。 歐美經濟係金融海嘯後增長明顯無法回到衰退前嘅增長趨勢，問題係呢個情況係各地經濟嘅歷史中係例外定係常態呢？三位重量級學者嘅研究就整理左23個先進國家自1960年以來嘅經濟增長數據，觀察衰退過後會否經常出現「後遺症」。 數據顯示60年代至2010年期間計有122次衰退。為確保數據真係反映後遺症問題，三位先作數據整理 --- 首先，排除衰退出現前兩年嘅經濟數據，以免經濟增長的趨勢受泡沬問題扭曲；如果衰退前嘅增長係同不尋常信貸急增（例如債務對GDP比率年增長達10%）同時錄得嘅話，就會排更多年度嘅經濟數據。之後他們就會利會排除了嘅兩年（或更多）再之前四年嘅數據（即T-6至T-2）推算經濟增長趨勢，並以之與衰退後嘅增長趨勢作比較。 圖中藍綫就是利衰退前六年至衰退前兩年嘅增長趨勢，再延伸推演出嘅「假如無衰退嘅話個經濟增長」嘅估算；黑綫則為實際出現嘅經濟增長。如果衰退後遺症係真嘅話，就會出現上圖黃色區域。如果衰退後經濟不單無法補回衰退帶來嘅打擊，甚至令增長愈來愈慢，黃色區域就會愈來愈闊。 下圖為美國自1960年嘅增長走勢，圖中黑色虛綫就係多次衰退前嘅經濟增長原有趨勢。可以見到，多次黑色虛綫較代表實際經濟增長嘅藍色實綫為高，即係話後遺症問題不時出現。 另一個觀察「衰退後遺症」嘅方法就係睇下衰退後個Output Gap有幾大。Output Gap嘅計法係將衰退前嘅增長趨勢減去實際增經濟規模數字；如果Output Gap為正數，亦即係衰退後經濟未能回歸原先嘅增長走勢，出現左後遺症嘅問題。 Blanchard等計算Output Gap嘅方法，詳細黎講係將經濟增長趨勢推算出的經濟增長規模，減去衰退後第三至第七年嘅平均經濟經濟規模，如果得出正數Output Gap，就顯示有衰退後遺症。 下圖為研究數據結果，四格顯示的為在不同調整數據方法下Output Gap嘅分佈。可以見到在不同數據調整方法下，正數Output Gap都為最多數出現的結果。 按照三位學者嘅計算，數據中高達70%嘅衰退後，都錄得正數Output Gap，而33%嘅衰退更出現Output Gap愈來愈闊嘅情況，即係後遺症不但令經濟無法補回衰退嘅打擊，更令經濟增長速度較衰退前更慢。 衰退理論上可以帶來上述嘅後遺嘅解釋，可以係衰退令大量勞工完全退出勞動市場，影響自然失業率；又或者衰退令企業減少投資科研，令生產力增長趨勢下降，亦可部份解析後遺症。 但Blanchard等都指出，呢啲理論都唔可以係在實證上充分解釋後遺症的情況。更難解析嘅，係衰退後出現增長率較之前更低嘅情況（即Output Gap愈來愈闊）。因為理論上只會係經濟嘅Total Factor Productivity增長率永久下降，Output Gap愈來愈闊先會才會出現。數據反映嘅增長率下降幅度太大，TFP增長率下降呢個理由難以解釋大部份個案。 三位學者就猜想係咪有其他因素令「後遺症」出現，其中一個合理嘅理由係部份衰退唔係由需求減少造成，而係由供應因素引致；例如油價急升，而實質薪酬普遍在短期難以改動，就可能可引發衰退；另外，亦可以因為金融系統出現流動性問題，導致短期的金融崩潰，都可令生產減少，帶來衰退。 數據顯示，與油價急升同時出現嘅衰退，有高達90%會錄得後遺症，較一般為高，而76%更是錄得Output Gap愈來愈闊。同金融危機相關嘅衰退中，有83%會出現「後遺症」﹐並有35%會出現Output Gap愈來愈闊。換言之，可能衰退後嘅經濟規模未能追回原來經濟增長趨勢，只係因為供應層面的因素有所改變，唔係所謂嘅「後遺症」問題。 可惜呢個仍未係完整嘅答案。 簡單嘅供求關係圖顯示，需求引致嘅衰退同時會錄得價格下降，而供應所致嘅衰退則會引致價格上升，所以三位就再以衰退時物價上升定係下跌來，再劃分衰退係需求或是供應所致作分析。結果發現，錄得物價上升嘅衰退之後，有73%機會出正數Output Gap，即係確實有部份情況唔係後遺症問題；但另一方面，錄得物價下降嘅衰退，亦有63%機會出現正數Output Gap，即係需求引致嘅衰退，有三分二機會錄得後遺症問題。 Olivier Blanchard係年多前接受Econ記者專訪時就指，「衰退後遺症」目前仍只係理論階段，「政策制定者作經濟規劃時，應該只當衰退後遺症有兩成機會係真有其事，唔應該百份百相信將個理論當真。」 「但作為一位經濟學者，我正努力進行有關嘅研究。」Blanchard續說：「係呢類研究當中，微觀數據係至關重要。個別有趣嘅研究正試圖理解長期失業點樣令人退出勞動市場；亦有啲研究探討衰退同科研發展嘅關係，亦相當有趣。」 「我嘅目標係將衰退後遺理論由只有兩成可信程度，提高至50%可信。」Blanchard指。 其實衰退有長期負面影響係好多普通百姓都理解嘅情況，點解經濟學者花幾十年時間去研究，但都係唔太肯定有無呢個問題？Blanchard答道：「例如話衰退令到多左人失業，甚至會因而自尋短見。呢啲都係衰退後遺症人所共見，係咪？但作為宏觀經濟學術，著眼點係個問題係整體數據上有無重要影響。有人自盡當然係極大嘅慘劇，但如果只有一個人咁做，對宏觀經濟又未必有影響。」 「所以，宏觀經濟研究就係要估算出到底衰退後遺嘅影響有幾大？估算有幾可信？後遺症有咩特質？係咪真係只係衰退之後先會出現？呢一系列嘅問題，宏觀經濟學都係無答案嘅。」Blanchard總結。 【本文嘅英文版可以在此細閱】

Tag: Eugenio Cerutti

Olivier Blanchard解述衰退後遺症（Hysteresis）