最後更新日： 2026年09月16日
加拿大8月嘅通脹率同7月一樣都係3%。用加國央行嘅核心指標CPI-trim同埋CPI-median睇，就根本去到2%，命中目標。
將通脹分成五大項，就會見到除左能源之外，主要嘅按年通脹貢獻就係黎自核心服務（即係扣除左能源）。
核心服務業對通脹嘅貢獻
咁點解核心服務會推高通脹呢？主要係因為旅行團價格呢一個項目。旅行團價格喺8月係錄得按年26.1%嘅升幅。
點解咁高呢？StatCan 喺佢份新聞稿有講到，呢個主要係基數效應嘅效果，上年8月受集體杯葛美國旅行影響，呢個項目錄得11.3%嘅按月跌幅，令個指數特別低；咁依家12個月過後，呢一個急降嘅數字唔再計喺12個月計嘅按年變幅入面，因此喺今年8月「僅跌」2.9%嘅情況下，按年錄得26.1%嘅升幅。
而因此，旅行團價格喺3%按年整體升幅入面，貢獻左成0.24個百份點嘅升幅。
廣告
對息口嘅影響
仲有一件事就係其實加國央行行長Tiff Macklem喺上個月嘅議息會議後記者會入面講過，3%通脹仍然係太高。當時佢講嘅係7月數字，咁8月數字不變就即係仍然過高，繼續支持加息傾向。
