最後更新日： 2026年03月26日
星期三公佈嘅二月英國CPI數字，係最後一份唔受伊朗戰爭影響嘅通脹報告。
- 整體數字同預期一致，就係維持喺3%不變。
- 核心（即係唔計食品同能源）通脹率就係3.2%，高過預期10點子
不過伊朗戰事當前，能源價格先係重點。
好多英國嘅朋友都知道，短期內電費同天然氣價格唔會係一個大問題
- 呢個係因為Ofgem每季都會定每度電同埋燃氣嘅價格，而第二季嘅價格喺打仗前已經定好左，近日嘅天然氣價格大漲最快只會喺7月先出現。
喺CPI數據入面，呢個電及燃氣開支放左喺Housing, Water and Fuels（我簡稱水電煤及住屋）呢個主要分項入面
- 喺圖大家可以見到上年四月嘅電費上限升左6.4%嘅效應，轉化成水電煤及住屋3.3%嘅按月升幅；當時就一度將個按年升幅抽高到去7.8%。
- 而又由於今年四月係講緊個電費上限會降低6%，去到四月當上年個加幅唔再影響到個按年升幅，再換入一個按月下跌嘅四月數據的話，呢個基數效應就會令個按年升幅急跌。
呢個就係點解英倫銀行喺二月時出嘅貨幣政策報告，估緊嘅係包含左水電煤及住屋嘅服務CPI，將會由依家嘅4.3%按年升幅，到四月大跌至只有3.2%。
ONS（英國統計局）嘅CPI報告入面另一個可以見到油價影響嘅地方，就係運輸用嘅燃油價格
- 整體而言，燃油CPI喺2月嘅仲係跌緊，按月跌1.1%，而按年跌幅更高達4.6%。
- 不過無架啦，呢個下個月就會完全轉向，由跌轉升架啦。
廣告
