聯儲局再減息—救就業較壓通脹重要

最後更新日： 2025年12月11日

聯儲局一如預期咁減息四分一厘，利率目標區間降至3.5-3.75厘。

反對票

雖然事前聽到好多反對聲音，但今次「只有」三票反對 

• 一票黎自理事Stephan Miran，一如以往要求減半厘 
• 兩票希望唔好再減，分別芝加哥聯儲銀行嘅Austan Goolsbee 同Kansas City 聯儲銀行嘅Jeff Schmid

評： 咁Miran同Schmid就上次都投左反對票，今次再投完全係「基本盤」。我事前都知要出現四甚至五票反對係大想頭，不過我一方面無預過理事Michael Barr唔反對減息，兩黎就係被視為「Powell親信」嘅Goolsbee會喺其他人唔投嘅情況下反對。但算唔算好出奇呢？又唔係嘅。

Dot Plot 及經濟展望

Dot Plot 首先顯示到嘅一點，用今年底嘅點去睇，就見到今次會議事實上一共有6位官員唔想減息，亦即係應該仲有4位無票嘅聯儲銀行總裁會投反對票（但無票）
其實餘比較大路嘅內容就包括

• 利率嘅展望中位數全數無變；明年只係預計減多一次息；
• GDP展望中位數全綫上調，特別係明年嘅展望由1.8%升到去2.3%
• 失業率展望中位數大致不變
• PCE通脹明年展望中位數由上次嘅2.6%調低到去2.4%；核心PCE嘅都調低左去2.5%

儲備管理買債計劃（Reserve Management Purchases）

聯儲局公佈左會重啟呢個用以確保金融市場流動性充裕（Ample）嘅買債計劃
按紐約聯儲銀行嘅公佈，佢會喺今個星期五開始喺一個月買入400億美元嘅國庫票據（或者有需要時改買年期餘下不足三年嘅國庫債券）；

• 及後每個月嘅買債金額，會喺每月第九個工作日左右公佈。
• 而該行亦講明，喺4月（美國人交稅大日子）之前都會有較高嘅每月買債量，之後先會降返低。
  解讀可以睇返呢篇文。

Powell喺記者嘅演繹

其實喺會後記者會嘅開頭，好明顯Powell想要表達嘅係未必需要再減，應該答三條問題就講左三次「well positioned to wait and see」（靜望其變）。

但好老實，成個記者會嘅感覺唔係太鷹派，我嘅感覺係因為佢太多野需要解述同演繹，講到都反而無市場原市預期咁鷹。

例如一個討論點就係，經濟展望入面點解個GDP 預測會上調，但失業又未見下調。呢度Powell就話反映係生產力上升，同埋因為第四季出現左政府暫停運作，令一啲增長「移後左去」第一季。呢度佢都重申，暫時個生產力上升因素係反映緊講緊長綫嘅情況，未係講AI嘅效應。但AI相關嘅投資，都係有份托高下年個GDP。

咁之後佢就要解答點解要減息嘅問題。減息所意味嘅就係今次聯儲局覺得救就業較壓通脹重要，點解呢？ 

呢個問題前前後後分開答左幾次，一個重點就係Powell頗擔心勞動市場轉冷嘅情況，例如佢提到近月嘅非農就業增長只有平均4萬個職位左右一個月，而佢覺得非農可能將會喺下年嘅修訂時被大幅下調，佢甚至講出個下調幅度可高達6萬個一個月，即係佢思疑目前嘅就業市場正經歷就業「負增長」（嗱呢個講法係有爭議嘅，目前並無太多證據去支持呢個講法，因為明年初嘅修訂只會包括3月前嘅就業數字）。

相對之下，佢對通脹就一個好明顯嘅論述：近期服務業通脹回落，可以抵銷貨品通脹嘅上升，而同時貨品通脹主要出現喺受關稅影響嘅行業之內，所以當假設關稅效應遲早會消散，咁通脹個問題就會隨之而去。

一作對比就會見到Powell嘅論述上，的確存在一個偏向減息嘅情況。呢個論述到底係咪只限解釋今次議息結果，定係可作為未來議息決定嘅基礎呢？呢個係重要嘅問題。

又例如，喺回答一個問到近期美國政治關鍵字「Affordibility」嘅問題時，Powell表示理解生活成本問題講緊嘅唔再係通脹率幾高嘅問題，而係過去幾年高通脹令物價上平升高左唔少嘅問題；亦因此，佢覺得個解決方法，就係刺激就業市場，確保名義薪酬增長可以高返過通脹，令美國人生活好過啲。

嗱，呢個都係一個減息救就業嘅傾向黎。

所以，我見到嘅係Powell預定嘅對白主要係集中喺將個利率政策變返去「停一停等一等」嘅狀態，以回應局內嘅反抗聲音。但佢個人而言，頗明顯對就業比較著緊，減息比較有用。