聯儲局再減四分一厘息 局內反對12月再減嘅聲音漸壯

聯儲局決定再減四分一厘息，利率目標區間降至3.75厘至4厘。

今次一個比較突出嘅一點，係投票出現三個意向：

• 10名FOMC 委員都係支持減25點子；
• 理事Miran希望減半厘；
• Kansas City聯儲銀行總裁Jeffrey Schmid 希望維持利率不變

另外喺終止QT方面，聯儲局落實左會係12月1日完結縮減資產表嘅行動。

• 現行嘅50億美元美國國債QT上限，到時會變成零，即係全數續回國債得返黎嘅金額，會用黎買入其他美國國債；
• 而所有由MBS得返黎嘅款額，則會再投資入美國國庫票據（即年期短過一年嘅國債）；

值得留意係，喺記者會嘅開場白，主席Powell講明FOMC內部對12月減息與否，有「Strong differing views」（不同強烈嘅意見），減息並唔係一個預定嘅決定（A further reduction in the policy rate at the December meeting is not a forgone conclusion），仲要加一句「far from it」。

係記者會上聽到嘅係，因為利率已經降至3厘至4厘呢個部份委員覺得係自然利率所在嘅水平入面，所以呢部份嘅官員覺得需要「等一等」及「take a step back」，12月要睇下先決定減唔減息。咁反映FOMC入面放慢減息步伐嘅聲音都頗大，Powell需要喺記者會上刻意提及佢地嘅諗法。

而Powell亦解釋左一個可以放慢減息步伐嘅原因，係從仲見到嘅數據上面，勞動市場都無急速轉差嘅情況，所以亦無急住減息嘅需要。

再者，依家係政府停止運作下，重要嘅經濟數據消失左，咁Powell都拎出Richmond聯儲銀行總裁Tom Barkin成日講嘅「大霧時你揸車都會放慢速度啦」呢個遘法比喻12月嘅會議嘅減息決定，指喺呢個不明朗加劇嘅前提下，聯儲局都應該要再小心啲行事。