美國次季經濟增長3% 入口減少為數據關鍵

美國第二季嘅經濟增長初值高達3%（呢個係經年化嘅數字，正常嘅數字就按季升0.734%），呢個增長數字可以話係相當亮麗。

但同第一季一樣，因為關稅政策會明顯對數字造成扭曲，所以好需要打開睇下各個Expenditure Approach嘅細項睇下啲增長喺邊度黎。

由下圖你可以見到，最大嘅增長動力係入口效應。

因為第一季好多美國公司要超前係關稅生效前入貨，所以上季就係入口急增然後庫存急增。庫存係歸類為投資開支，係對GDP增長數字有推動效應，但入口就因為唔係GDP（本地生產總值）所要計嘅「本地生產」價值，所以要喺消費、投資及政府開支入面抽返啲入口出黎先會計得岩；因此，入口上一季就對個增長數字帶黎左一個極大嘅負數「拖累」。

相關文章: 美國GDP首季跌0.3%嘅解讀

去到第二季就個情況倒返轉，因為之前過量入貨，第二季就可以入少啲，用返庫存入面啲貨先。咁當個入口「拖累」效應大幅減少，從整體GDP增長數字黎講就會變成一個高達5.18個百分點嘅「增長貢獻」 — 唔係真係入口減少可以帶動經濟增長，只係入口減少可以用黎「解釋」個增長率上升，係一個季度比較數字上嘅演繹。

當連續兩季因為關稅問題，令入口同庫存（即係生產左但未用到嘅野，今季嘅增長降速令GDP增長低左3.17個百分點）兩個喺統計上用以確保數據概念一致嘅「調整因素」大幅上落，就令個畫面有啲亂。

但如果我地集中睇返各個開支分類嘅增長貢獻，可以見到

1. 消費（綠色）嘅貢獻為0.98個百分點，較首季有所反彈但遠低過之前兩年嘅增長貢獻。
2. 投資（扣左庫存，圖中紫色）貢獻則為0.08百分點，明顯係上季超前投資後有所回軟；不過其實上年下半季以黎投資都係偏弱。
3. 政府開支（藍色，喺紫色上面所以好難睇到）貢獻都係0.08百分點；喺DOGE大原則嘅聯邦政府削開支帶動下，貢獻都係細。

所以，如果我地用返聯儲局近年常用嘅PDFP（Private Domestic Final Purchases），即扣除出入口、庫存同政府開支後，只集中係本地需求的話，個增長率跌至只有1.23%，同埋明顯係走下坡。

所以喺本土需求嘅角度睇，美國經濟係正在轉弱。