星期五Powell喺大跌市期間有個演說，佢雖然有提到關稅比預期更大規模，而結果帶黎嘅短暫通脹效應可能亦會較大，但都係「聯儲局處於一個有利嘅位置，可以等多陣不確定性減少啲先作出反應」之類嘅諗法，所以個市聽完無Fed Put就繼續跌落去。
好明顯嘅一件事，就係Powell都同意出左一大張對等關稅清單，亦無助降低聯儲局所面對嘅不確定性。
大家要理解，依家個不確定性最少有兩個層面，一個係唔知Trump政府會做啲咩，第二層就係聯儲局因而唔知可以點應對關稅嘅影響。目前Powell嘅立場，就係關稅正常只會帶黎短暫（可以係叫one-off，甚至可以話transitory）嘅通脹效應。所以只要唔好影響到長綫嘅通脹預期，聯儲局可以不理會呢個效應。而佢目前唔急於製造任何加息嘅預期；亦因此，可以等多陣先算。
但呢兩日個市大跌，對金融市場帶黎壓力，緊急嘅問題變左「你可唔可以快啲減息呢？」
呢度有一點，我可能係太敏感，因為好多主流報道都無咁樣去理解，但Powell今日提到新政府上場有好多新嘅政策出台，包括移民、貿易、監管同財政政策，呢啲政策嘅細節同佢地嘅影響依家必太清楚，所以帶黎不確定性。但如果你一年之前睇就會清晰好多，而呢個同之前換政府分別不大。（可見片中約11分鐘開始嘅答案）
我好聚焦嘅一點，係佢用「一年後」作為有信心不確定性會大降嘅指標。唔係幾個月，係一年。
佢訪問嘅後期都被問到「即係等幾耐」（約30分鐘左右），佢答「我答你唔到」，但其中一句係「we will see the real economic effects as the year goes」（即今年慢慢過去你就睇到新政府喺上述四方面新政帶黎嘅經濟效應）。
換言之，當大家講緊下個月都驚大蕭條，佢同大家講放長雙眼睇下一年之後點，到時個畫面會清楚好多。
我唔會話聯儲局一年內唔改變息率，但Powell目前好顯同市場處於唔同嘅timeframe。後者開始驚慌、前者仲係「等一年慢慢睇清楚」。
咁可能市場要再俾多少少心機跌落去，先好期望Powell使出「Fed Put」。
