今個星期五公佈嘅一月就業報告有個好重要嘅一點，就係份報告有兩個大幅數據修訂
包含失業率在內嘅Household Survey就會採納Census Bureau（人口統計局）最新嘅人口估算。
- 因為Census 喺12月中將移民人口嘅估算大幅上調，所以BLS就以此作基礎上整體人口數據會大幅上升。
- 但因為呢個修訂會同時影響失業人口、就業人口等嘅估算，所以見到嘅實際影響應該反而唔會太大。
- 呢個係一個年度修正，每次都令新嘅數據唔可以用之前嘅直接比較。大家可以參考下上年嘅修正。
而主要包括非農就業人口數字嘅Establishment Survey，就會採納較詳細同準確嘅Quarterly Census of Employment and Wages (QCEW) 就業數字作基礎，修正去到上年3月嘅非農就業數據。
- 咁上年8月個初步修訂都預示左，非農數字係會大幅下調。
- 當時就顯示非農就業去到上年三月高估左81.8萬個，而平均除返開12個月就會要每個月減返大約6.8萬個職位。
- 不過，分析指最終嘅修訂規模通常會細過8月時嘅初值。
- 呢個都係一個年度修訂，不過佢係會重估近年嘅數字，令數據可比性得以持續。
所以Establishment Survey呢個修訂會將非農就業人口嘅整體水平調低，即係個勞動市場就相對無之前講嘅咁旺。
另外，係每年一月嘅就業報告，BLS都會調整下佢對於有幾多公司成立/倒閉嘅估算，即所謂嘅Net birth-death
- 因為新公司會製造新嘅就業機會，但又未必可以係固有嘅sample（樣本）入面反映到，所以每年初BLS都要調整下個估算去減少誤差。
- 而呢個調整就會影響到去年三月打後嘅數據啦。咁一個講法就係呢一部份嘅調整都係會調低非農數據嘅整體水平，因為之前嘅高估太多，藉呢個方法可以提早減低返個誤差。
大家可以睇返上年嘅修訂作參考。
