今日想講下阿特蘭大聯儲銀行制作嘅GDPNow，一個「實時」美國GDP估算。大概十年前開始做記者時，呢類Nowcasting工具仲係好新嘅概念，但到今時今日已經好多變成一種常用指標。
如果你無太留意過呢啲工具嘅話，簡單黎講就係因為Bureau of Economic Analysis（BEA）編制GDP時，其實都係用其他經濟指據（例如零售銷售、CPI、PPI、PCE數據）作為input。咁又因為呢啲數據唔少係每月公佈，咁研究員其實可以仿照BEA計GDP嘅方法，用已經公佈嘅月度數字去估算當季嘅經濟增長。
當然，一季有成三個月，季初時唔只話啲數據未公佈，更實際上有好多係直情未發生。呢啲情況下，個模型嘅做法就係用現有數據放入Econometrics模型去估未公佈/未發生嘅數字。亦因此，呢啲估算開頭無咁準，去到第三個月左右就會準好多。
咁現時GDPNow估緊係今年第三季嘅GDP增長率。第三季已經完左，官方嘅初值數字仲會喺今個月30號公佈，而唔少會用作GDP計算嘅月度數字都出左，所以個GDPNow數字好有實用價值。
去到星期五，GDPNow預計第三季GDP增長為按季3.4%（經年化），即係仲高過第二季嘅3%。其中，消費增長相信仍然強勁，按季增長會高達3.6%。做個對比，第一同第二季嘅消費增長分別係1.9%同2.8%。
即係假設GDPNow估算唔太離譜嘅話，就即係：
首先，美國經濟增長仍然強勁；
同時，增長仍然由強韌嘅消費需求支持。
尋日講零售銷售數字時都提到，如果按季計，被用作GDP基礎數據嘅所謂Control Group 零售銷售數字（即扣除食品、汽車、燃油及建築物料）第三季嘅升幅高達1.46%，仲高過第一同第二季嘅0.43%及0.93%。消費開支愈升愈快，我估會成為反對急速減息嘅聯儲局官員一個好強勁嘅理據？
仲有一件事我想講嘅係，GDPNow網站係有公佈每個相關經濟公佈後，對佢個整體估算嘅帶黎幾大嘅改變。例如周四嘅零售數字及工業生產數據，就令佢嘅GDP增長預測高左0.18個百份點，其中包括由個人消費貢獻0.21百分點增長，同埋投資帶黎0.03個百分點下跌。
有時我唔太鐘意用市場/分析員預期黎「量度」一個經濟數字「好唔好」，因為咁睇就係將個重點放係個數字同反映左喺資產價格嘅「市場預期」之間嘅差距，對投資有用，但未必反映到對實體經濟好唔好。
所以有時我會用數字對GDPNow嘅改變黎衡量佢嘅實質影響。當然，新數據對GDPNow嘅影響，其實應該都只係反映數據同模型之前嘅估算之間嘅差距，但轉個角度睇，我地大約可以睇到個數字同咩水平嘅經濟增長一致，作為經濟仲有幾健康嘅參考。
