上星期聯儲局減息50點子，第一下當然當然係覺得驚奇，點解真係減半厘而唔係25點子，我亦的確係覺得我對聯儲局官員講話嘅解讀能力真係不合格（你睇返我呢篇寫Waller嘅演講，就見到我錯得離譜）。
不過之後睇到一件事，我就全神貫注咁諗左好耐： 點解個Dot Plot 入面嘅「較長綫」（Longer-run，圖中最右）利率預期圖表咁「瘦」嘅？
首先講下呢個長綫利率dot plot 係咩黎。據聯儲局嘅官方解釋，各個FOMC委員應該寫低假設經濟無受任何沖擊之下，個利率應該停喺邊個水平。一個簡單啲嘅理解就係呢個圖反映各個聯儲局官員對自然（名義）利率水平嘅估算。
點解我會話個圖「瘦」呢又？
因為一個自然利率Dot Plot 通常有一至三個「群組」，所以正常黎講唔會咁瘦。例如我地睇返黎自2012年1月、史上第一個Dot Plot，我地就明顯見到兩個群組。
其實單從經驗同埋印象，我會話應該從來未試過有自然利率Dot Plot係咁瘦嘅。
不過，為左寫呢篇文（其實係先寫左英文版嘅），我走左走睇晒歷黎咁多份嘅Dot Plot去驗證下我呢個諗法。唔多嘅，無計錯數就係一共51份。又如果我地用最少五個人㨂同一個利率定義為一個群組，我可以話俾各位聽今次的確係第一次喺自然利率預測方面無見到任何群組。（你上返去就睇到，最多人㨂嘅利率都只有三個官員支持。）
「無出現群組」係一個講法，另一個角度睇就係各個官員對自然利率無太一致嘅諗法亦無明確嘅共識，所以啲點無法聚埋一齊。因此，個圖嘅高度亦較正常為長。
(Source: https://bsky.app/profile/domw.bsky.social/post/3l4iy32t47a27)
咁有咩問題？ 我唔會話呢個係一個「危機」之類，但始終自然利率係理論上係減息周期嘅終點，而我睇呢個圖見到嘅就係聯儲局官員對終點係邊個水平，未有明確嘅共識，總之就喺2.375厘至3.75厘之間啦。
當然啦，減左半厘之後，聯儲局嘅利率目標區間為4.75厘至5厘，同最高嘅自然利率估算都仲有成一厘嘅距離，所以我認為官員仲有一至兩年去建立新嘅自然利率共識（或者群組）。唯一問題只係我地呢啲外人，對聯儲局嘅減息終點能見度多多少少低左啲。
