今日繼續講多少少我對Jackson Hole嘅胡思亂想。
喺星期五個演說，Jerome Powell講明聯儲局減息嘅「時辰已到」（the time has come），即係九月嘅會議開始減息周期亳無懸念。問題係，理論上減息唔係一個聯儲局主席話事架喎，係FOMC（聯邦公開市場委員會）12個委員投票嘅結果黎喎。你Powell話時辰到者，有無諗過其他委員嘅感受先？
例如，喺Jackson Hole期間做嘅訪問，被問到點睇Powell時辰到嘅宣言，芝加哥聯儲銀行總裁Austan Goolsbee話: 「Powell嘅講話好明確。但你都知啦，個規矩係我地（聯儲局局官）係唔可以討論其他官員嘅睇法…」然後就講自己點解覺得可以減息。
又例如Richmond 聯儲銀行總裁Barkins就答：「Powell份稿係佢自己寫嘅，可以講佢想講嘅野。」之後再加返句「我認為Jay (Powell) 嘅講話全面同負責任咁反映我地委員會嘅整體嘅諗法。」
過左幾日之後，三藩市聯儲銀行總裁Mary Daly嘅答法直接好多啦：「我地呢幾個月都準備緊調整利率，係等緊有更大嘅信心見到通脹趨向2%同勞動市場回歸平衡，而呢啲都絕對出現左。」所以調整利率嘅時機已經到左。
我想講嘅唔係啲聯儲局官員對減息有抗拒，你喺7月議息會議嘅紀錄都見到
The vast majority observed that, if the data continued to come in about as expected, it would likely be appropriate to ease policy at the next meeting.
即係絕大部份官員都同意如無意外可以喺9月減息。
想講嘅係，幾位官員都希望俾返大家一個印象，「時辰到」係Powell嘅「個人意見」，然後就會加返句「雖然我都同意…」。
或者咁問： 除左Powell之外，你認為其他官員可唔可以咁切實去講「時辰到」？ 又或者就算佢講左，市場信唔信？
Powell治下 反對票佔極少數
Powell嘅聯儲局任期一個好明顯嘅特點，係佢FOMC內絕少收到反對票。例如睇下呢個Axios今年4月做嘅圖表，Powell 2018年2月開始做主席，多於六年嘅任期入面有三年無收過任何反對票。
對上一次FOMC有反對票出現已經係2022年6月。現任七名聯儲局委員加上12個區域聯儲銀行總裁入面，只有Minneapolis嘅Neel Kashkari喺任期入面投過反對票。你話呢個FOMC係幾咁和諧~
理論上，聯儲局嘅設計就要「聯邦制」，放入區域銀行總裁就係要確保各個地方嘅聲音都得到平衡。當然個事實唔太係咁。呢個唔係Powell時期先有嘅「設計」，例如你睇下Alan Greenspan嘅後期。
不過我對於Powell之治一個疑問，就係呢個明顯「等Powell發落」嘅共識確立制度，係咪真係長治久安架？
但又或者個答案係：「邊個想成為Soft Landing 期間唯一反對嘅人？」
