通常美國出就業數據嘅同日，加拿大統計局（StatCan）都會公佈佢嘅勞動統計報告（Labour Force Survey）。好似我咁想睇同寫晒兩者就會有啲忙啦。
近期一個有趣嘅觀察係，當美國就業市場仍然強勢嘅同時，隔離嘅加拿大勞動市場就開始見到隱憂。首先，加國失業率係持續出現一個緩慢嘅升勢。
- 3月失業率更加回升至6.1%﹐對上一次高過6%已經係2022年1月。
- 當然，6% 失業率係加拿大嘅歷史唔算太高。但疫情以外最後一次失業率6%就要數到2017年11月，亦後加拿大同美國一樣，可以維持係低失業率呢個「健康」情況。
之前都講過，今年失業率嘅升跌，背後都係要睇加拿大勞動市場點樣去消化過去一兩年引入嘅大量移民
- 今個月首先嘅一個問題係就業職位唔單只無增加，仲要係增少左2200個。
- 但同一時間，勞動人口嘅增長仍頗高。繼2月增加左7.6萬人，3月再增加多5.7萬人。
- 或者咁睇，今年第一季嘅就業增長只係7.6萬唔夠，但勞動人口就增加左15萬有多，點去消化係一個大問題。
- 而可工作人口（即15歲以上）嘅增長（下圖灰綫）係更加穩定地高，例如StatCan就話至今年3月嘅12個月內，可工作人口就增加左3.2%，即多左100萬人。
- 當然唔係每個可工作人口都會轉化成勞動人口（所謂嘅轉化即係開始揾工或者揾到工），但呢個轉化比率到底幾高幾低，亦係未來失業率升勢嘅關鍵。
有趣嘅係，3月嘅平均時薪增長仍然有5.1%呢個高水平升幅
總結
呢個失業上升、勞動人口急增但薪酬增長嘅有趣情況，一個簡單嘅解釋可能只係人工仍然需要追返通漲。 但如果要我同其他夾硬數字一齊去亂估嘅話，有可能所謂嘅新移民勞工同市場嘅工種配對問題都會係一個成因。雖然個就業市場多左好多供應，但顧主都未係太容易請到佢所需嘅員工，因而薪酬增長持續。唔知係咪真係咁，但好值得留意未來幾個月時薪數字嘅走向。
後記
Indeed嘅經濟師Brendon Bernard指出，時薪增速仍高嘅成因，相信因為較高薪嘅經理級職位嘅比例過去兩年顯著上升左，令平均薪酬持續錄得較高增幅。呢個解釋我認為較我上面嘅理解更有內容。
Putting 2 & 2 together on strange LFS trends:
– The % of workers who are managers has soared in the past 2 years.
– This shift impacting average wages: separately wage growth among managers/others are both near 4%. But b/c of the jobs-shift, the headline is +5%! pic.twitter.com/mu7GQ4pcSY
— Brendon Bernard (@BrendonBernard_) April 5, 2024
