歐元區三月份嘅HICP通漲率按年升2.4%
- 核心數字（即扣除食品、能源及煙酒）亦跌到去2.9%；核心通漲上一次低過3% 已經係2022年2月。
- 整體通漲更加係2021年7月以黎最低。
因為兩個數字都係低過市場預期，所以主要嘅報道都話呢個數字可以加強歐央行喺6月減息嘅信心。（歐洲動態嘅報道係呢方面嘅著墨較多，大家可以睇睇）
按月核心升1.1%
但如果轉一轉角度，睇按月升幅就其實有唔少隱憂
- 整體通漲按月升幅為0.76%
- 核心通漲更加係較2月升1.1%；係大通漲重臨之前，1.1%可以係歐元區一年嘅通漲升幅架啦!!
- 要記住，如果要一年通漲2%，平均每個月嘅升幅只會係0.165%；0.76%同1.1% 都係遠遠超過呢個數字。
咁點解按年通漲會跌？
呢個就係所謂嘅Base effect
- 上年3月整體升0.9%，核心升1.25%
- 所以今年3月計按年時，呢兩個數字唔再計，較為就係加入「較細」（但仍然相當高）嘅0.76%同1.1% ，所以按年數字仍然有所減速。
呢個情況亦都可以話歐元區嘅通漲係有一定嘅季度因素，近幾年3月嘅按月升幅都係特別高，亦因此市場預期仍然可以高過實際數字。
- 值得留意，4月亦都係一個普遍高通漲嘅月份。上年整體升0.63%同核心升0.99%，所以個base effect 嘅門檻仍然「偏低」
到底呢個季度因素之後，歐元通漲係咪會持續回落，令歐央行可以順利減息呢？ 呢個仍然係需要觀察嘅。
