六月頭睇左JP Koning 嘅一篇專欄，講嘅係委內瑞拉居民一個逃避極高通脹嘅方法。
美國有一個由多間銀行合作推出嘅免費轉數平台叫Zelle，用法大約好似香港嘅轉數快（FPS），只要對方有相關嘅美國銀行戶口又有注冊，你入佢電話或者email就可以過數俾對方。
委內瑞拉人近年面對超級通脹，所以已經轉用美元為主要交易貨幣。問題就算賺到美元外匯收入，實體美元鈔票都唔係隨手可得，要支撐起全國交易更加係困難。窮則變變則通下，委國人開始改用電子美元交易系統。
雖然我其實唔係太理清楚委國人係點樣係美國銀行開戶口，亦唔知實際上點樣將自己嘅收入放去呢啲美國戶口，但佢地成功利用Zelle創造左一個平衡交易網絡 — 即係用美元係美國嘅轉帳平台處理委國本土嘅交易需要。
係呢個安排下，只要有美國本土美元戶口同美國版轉數快，唔再需要運入實體美鈔都做到美元化（dollarization），委內瑞拉人透過Zelle就可以用到美元去超市買野同去cafe買咖啡等等。
去到六月頭其中一個Zelle嘅創辦銀行Wells Fargo，就停左好多委內瑞拉用戶嘅戶口，話Zelle嘅使用條款講明唔可以商用，只可以做個人轉數之用。當然，唔少人都覺得同委內瑞拉仍受美國金融方面嘅制裁有關，銀行傾向想避免麻煩。
但呢個「實驗」啟發左我嘅思考 — 理論上全世界可以一齊用美國本土嘅轉數交易系統，用美元做日常交易架喎！
你諗諗，好多新興市場國家係用左美元存備支持佢嘅貨幣，咁理論上呢啲地方嘅人都係持有緊美元資產，個市場都係美元化左嘅；只係中間多左個中間人，就係央行將計價貨幣轉換左一次。
但委內瑞拉人證明左，係現時網絡交易世代你用黎交易嘅資產，其實完全無需要留係本土金融系統同本地貨幣，轉成美元放係美國個交易能力係一樣、甚至更好。
不過大家都知道，要用美國金融系統嘅交易服務，首先要有一個美國戶口。委內瑞拉同美國就話近，啲人可以短途飛機去當地開銀行戶口，對其他地方就相對困難。大家近一年都知道，開個離岸戶口唔係咁易。而美國係911事件後，亦收緊外國人開戶嘅要求，基本上你一定要親身去到當地先開到。
當然我明白呢種控制洗黑錢嘅措施重要，但幻想下美國開放佢嘅金融交易系統俾全世界嘅人，你只要達成基本條件就可以開到一個簡單嘅網上存款交易戶口嘅話，好多地方嘅居民都可以唔洗再理當地央行對幣值嘅操控，同時又可以更易使用到美國金融融科技嘅創新，聽落好似係幾理想嘅事。
問題係，呢件事對美國有無着數先？呢方面就係我未仲需要再研究之處。
新興市場央行大量屯積美元資產係近二十年嘅大勢，將呢啲美元放返入居民手上，再存入美國在岸金融系統，對美元國債息率唔似會有咩大影響。咁對美國銀行有無好處？多左資金存入，係咪可以幫佢地提供更多投資資源？定係呢啲係低利潤生意，資本要求高佢地令唔想做咁多？
我唔識，要再研究下。你有咩意見亦不妨交流下。
最後，其實我想話，呢個都係支付寶微訊支付等中國交易系統嘅發展模式，係國外嘅中國人用佢地做左個平衡交易網絡。分別，可能只係人民幣並唔係好硬嘅貨幣。
【本文另設更詳細英文版本】
