金管局向聯儲局用FIMA Repo Facility借 100億美元

金管局向聯儲局用FIMA Repo Facility借100億美元,呢個公告已經係上星期三嘅事。反正無咩人睇,其實遲啲解釋都唔遲。

金管局向聯儲局借成100億美元,係咪金管局唔夠美元用?呢個問題係本文討論嘅主旨。

係解釋FIMA Repo Facility前,先解釋FIMA係咩。全寫係 Foreign and international monetary authorities ,指嘅係有係紐約聯邦儲備銀行(New York Fed)開戶口嘅央行及國際金融組織。無錯,New York Fed 真係有銀行服務嘅,佢可以為其他央行進行美元轉帳、美元資產託管,同埋投資服務。換言之,金管局係New York Fed有個戶口,用黎放一啲美元資產同埋投資之用嘅。

聯儲局嘅FIMA Repo Facility嘅設立,就係向一眾係New York Fed有戶口嘅央行推供一個新嘅服務 — 央行可以將戶口入面嘅美國國債暫時用黎做抵押品,聯儲局就會借出美元現金(即係所謂嘅repo)。

金管局就係打算用呢個方法,將佢係New York Fed現有嘅美國國債,轉換成100億美元現金,再用黎成立一個借貸工具,向本港嘅銀行借出呢批現金。呢個將會係5月6日開始嘅新工具,係由銀行向金管局提供合格抵押品(Exchange Fund同 Bills),借取美元現金(都係一個repo),每次為期七日。

係上述嘅簡介可以見到,金管局係咪唔夠美金呢?咁基於FIMA Repo嘅前提係央行要係New York Fed持有等值嘅美國國債,呢個就其實已經無咩可能。但至於香港銀行體系係咪唔夠美元流動性呢,我就唔能夠由上述嘅資料答到你。

不過,同樣係4月22日,金管局就因為港元匯價觸及強方兌換保證,要向市場出售15.5億港元。呢度金管局嘅主要交易對手係本港銀行,亦即係向金管局本港銀行體系買走左2億美元。

今日(4月27日)金管局就再次售出23.25億港元,即係再向本港銀行接走3億美元。咁睇,香港銀行體系似係覺得美金供應太多,港元供不應求。

而呢個故事亦都可以講到FIMA Repo Facility嘅一個重點,就係佢本身同聯儲局嘅央行貨幣互換協議(Central Bank Swap Lines)唔同,唔係一個主要幫其他國家央行嘅工具。FIMA Repo係借美金俾持有大量美國國債嘅人,亦即係較唔怕無美金嘅國家。呢個工具嘅重點係提供誘引令呢啲美國國債持有人唔好一齊沽出國債,以降低美國國債孳息出現短期波動嘅情況,較似係利聯儲局自己嘅政策。

另外值得留意嘅一點係,用FIMA Repo套現係要俾利息嘅,定左係IOER利率加0.25厘,目前IOER係0.1厘,即係FIMA Repo嘅利率係0.35厘。據金管局提供嘅Terms,佢會用相同嘅利率係佢個美元工具借錢出去,即係個利息成本會由借錢嘅銀行全數負擔。

至於金管局唔公佈個別銀行用呢個工具借美元嘅,呢個係常見嘅防止Stigma方法,聯儲局係Discount Windows借錢都係過兩年先公佈邊個借左,就係怕你知道邊一間借左錢,你走去擠提佢囉。

登記本網Newsletter,就可以不定期收到專業嘅經濟學術及經濟時事討論