聯儲局最新嘅議息結果同時附有最新嘅資產表計劃詳情，尋日講過個人而言並無預期到個計劃會咁早公佈，所以算係喜出望外。更重要嘅係資產表嘅安排亦遠較市場預期嘅為「鴿」，所以更值得仔細了解。
第一個重點，係聯儲局正式公佈會係2019年9月底停止縮減資產表規模，係較市場普遍預計嘅2019年底為早。要留意，聯儲局會先係今年5月每開始將每月減持美國國債嘅金額，由現時嘅300億美元下調至每月150億美元，再係10月開始停止減持美國國債。
要留意嘅係，10月之後聯儲局係會繼續減持手上嘅按揭債券，減持額會維持每個月200億美元。但唔係話10月開始個資產表規模會維持不變？因此，聯儲局會係10月開始用減持按債得黎嘅資金，係二手國債市場買入等值美國國債，以確保資產表規模大致不變。
之前提過因為QE本質係延長持有國債嘅年期，以壓低長債息率，令目前主要持有較長年期美國國債。聯儲局打算改變呢個情況，第一步就係將減持按債再投入美國國債市場時，購入嘅國債年期將會按財政部現行已發行嘅國債年期分佈作基準，買入大致相同比例嘅不同年期美國國債。
現時聯儲局嘅資產表規模大約係3.9萬億美元，按上述嘅減持速度大約可以將規模係9月下降至3.7萬億美元，之後就會大致不變一段時間。
單計銀行體系嘅聯備總額，將會由現時嘅1.7萬億美元降至9月嘅1.5萬億美元，但聯儲局講明如果流通貨幣等嘅央行「負債」繼續上升，聯儲局會以減少儲備黎應對，確保資產負債表嘅規模大致不變。
