目前英國內部正思量申請延長Brexit期限幾耐,下星期初首相Theresa May(文翠珊)將會再將被兩度否決嘅Brexit協議法案提交國會,如果通過就會申請延期至6月30日,協議再被否決就可能會申請長時間延期,大有機會超過一年。

對歐盟方面,Brexit延期一個大問題就係長時間延期嘅話,英國就要參與5月底嘅歐洲議會選舉:

  • FT引述一份歐盟分發予歐盟官員嘅草稿文件指,英國假若要求延期Brexit超過三個月,就一定要參與5月23-26日舉行嘅歐洲議會選舉。
  • 若然英國唔參加選舉,歐盟將會係7月1日單方面取消英國成員國身份。
  • 7月1日之期,係因為新一屆歐洲議會係7月2日開始,屆時英國無議會代表就將失去合法地位。

草稿亦指明,歐盟其他成員國係英國延期申請一事上,除要求英國參與歐洲議會選舉外,不可以新增任何條件要脅。另外,延期Brexit亦將意味著歐盟與英國就未來貿易等嘅談判唔會開始,因為歐盟只會係英國脫離歐盟之後,先會同英國作相關嘅談判。

登記本網Newsletter,就可以不定期收到專業嘅經濟學術及經濟時事討論