歐債危機之後經濟學者學識左銀行體系同政府財政,可以係危機時形成一個累鬥累嘅惡性偱環(Doom Loop)。即係,銀行體系出現問題時,可能會拖累國家財政穩定;而國家財政不穩又可能反過黎令銀行體系受到更大嘅衝擊。

早前ECB就刊出一篇論文《Managing the sovereign-bank nexus》詳細論述呢個累鬥累偱環,據七位合著嘅經濟學者嘅整理,銀行同財政之間嘅惡性偱環可以歸納為三條風險傳播渠道。

第一個叫 Sovereign-exposure Channel,其實就係講銀行直接持有唔少國家發行嘅債券,當國家財政狀況轉差,銀行手上嘅持債價值可能因而下降,咁就會直接損害銀行嘅資產價值。同一時間,由於銀行係國債嘅主要購買者,換言之係政府融資上擔當重要角色。若果銀行體系出現危機而影響到佢借貸能力,無法如常購入國家債券,咁就可能令政府嘅融資成本上升,甚至可能有短期流動性下降嘅問題。

係 Sovereign-exposure Channel一個重要嘅問題,就係點解銀行要持有咁多國家債券?簡單嘅原因係國債一般有極高嘅市場流通性,銀行可以輕易轉手套現;而國債亦係貨幣市場常用嘅抵押品,因此銀行對國債有穩定嘅需求。

第二個渠道係 Safety Net Channel,講嘅就係國家有責任係銀行體系出現嚴重困難時出手救助,但救助嘅成本往往會成為財政負擔;若果國家嘅財政本身已經唔係太穩健,要拯救銀行反而可能令市場對國家嘅還債能力失信心,令國家融資成本同財政開支急升。

同一時間,如果市場對國家財政有疑問時,亦會明白到銀行體系難以依靠政府作為靠山;係呢個時間若銀行體系受到衡擊,就好易出現信心危機,倒過黎再拖累政府財政。

第三個渠道就係 Macroeconomic Channel,即係國家財政不穩可以令實體經濟受打擊,例如社會整體嘅融資成本大增,又或者經濟政策嘅不確定性大增。當實體經濟運作唔順暢,銀行手上嘅貸款資產價值,就可能因為居民嘅收入及還債能力下降而受損,令銀行體系嘅穩健程度都受影響。銀行不穩可能令實體經濟更難取得融資,帶黎經濟危機,政府又要使用財政資源黎拯救經濟,加重財政負擔。

【本文設英文版本

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous articleForward Guidance可取替QE支撐歐元區經濟 – ECB執委Praet
Next article意大利可能出現財政-銀行累鬥累旋渦?
Econ記者網站新聞團隊(絕大部份時間其實得一個人主理)

留言區

This site uses Akismet to reduce spam. Learn how your comment data is processed.