近幾年愈黎愈多科企巨企僱用經濟學者，但其實Google、Microsoft、Uber同埋Airbnb等嘅公司到底要經濟學者黎做咩？而經濟學生要識啲咩先有機會入科企巨企打工呢？呢個就係論文《Economist (and Economics) in Tech Companies》嘅題目。
作者Susan Athey曾任Microsoft首席經濟師，並現正擔任Expedia、Lending Club同Ripple嘅董事會成員；另一位作者Michael Luca近年就同Yelp合作，利用Yelp嘅數據做大量經濟研究。
呢篇論文入邊，兩位就簡述經濟學者可以邊啲範疇上幫到科企，並引述近年係相關題目上嘅研究文章。例如，經濟學者嘅市場設計上嘅知識，就可以應用到科企賣廣告或者配對用戶等場景；而經濟學者係隨機實驗嘅知識，加上對市場均衡情況及動機嘅分析力，對例如Amazon等嘅科企進行A/B Testing入面嘅設計微調，就相當有價值。
另一個例子，就係經濟學者可以利用對動機分析及行為經濟學嘅概念，幫助科企設計更有效嘅售後評分機制，減少「打手」或者「評分偏高」等嘅情況出現。
就算你無興趣做科企（或者好似我咁無可能有資格做到科企），呢篇論文搜羅左大量同科企應用有關嘅研究，作為一篇概覧文章都係相當值得一睇。
論文全文：
