Central Bank Swap Lines(央行貨幣互換協議)通常兩間(或以上)嘅央行互相協定。例如聯儲局同歐洲央行講明當市況有需求時,可用市場匯價互借對方嘅貨幣。

當歐央行急需美元供應俾歐元區內嘅銀行時,就可以利用互換協議向聯儲局借入美元;同時歐央行會向聯儲局借出等值嘅歐元。歐央行取得美元之後,就可以借予歐元區內嘅銀行。

呢筆「借貸」係需要支付利息,亦有不同年期嘅安排,一星期至三個月不等。正常而言,歐央行會用相同年期及匯率向區內銀行借出呢筆美元。當歐央行收回呢批美元後就會以協議訂立時嘅匯率換回歐元,整個互換行動亦告一段落。

如果銀行向歐央行違約,唔歸還個筆美元,歐央行就要自行係市場上買入等值嘅美元,再還俾聯儲局。

根據Ricardo Reis及Saleem Bahaj呢篇研究指,2001年911事件後,美元貨幣市場崩潰而令不少外國銀行無法取得美元融資,最後聯儲局同加拿大央行、歐央行及英倫銀行達成900億美元嘅互換協議舒緩危機,自始央行互換協議成為常用嘅流動性供應工具;係金融海嘯時就係極常用嘅政策工具。

下圖係聯儲局近年嘅貨幣互換協議中嘅美元供應,係金融海嘯後特別高。

研究指,目前全球約有160個雙邊央行互換協議。而自2013年10月,聯儲局、日本央行、瑞士央行、加拿大央行、歐央行及英倫銀行就設立左常置貨幣互換協議,成為環球金融政策長期嘅工具。

Voxeu原文:

https://voxeu.org/article/central-bank-swap-lines

The End


如果你覺得本網嘅文章有價值,建議大家係
Google News ;或 Patreon follow 我地
咁就可以最快咁睇到我地新刊登嘅文章。
Previous article貨幣政策與Macroprudential Policy之間嘅關係
Next article實質利率孳息曲綫反轉又點解?