New Keynesian宏觀學術模型，為90年代中後期開始主流宏觀經濟模型採用嘅理論框架，並由80年代嘅Real Business Cycle （RBC）模型進化而成。
因為加入左Price Stickiness （價格僵性）等舊有Keynesian學術強調嘅元素，故有New Keynesian之名。
New Keynesian與RBC模型都係以DSGE作為基礎方法準則。DSGE即是Dynamic Stochastic General Equilibrium ：
– Dynamic係指模型要有處理時間呢個因素嘅能力，亦因為模型內有唔同嘅時段，模型參與者嘅預期亦因而成為重要嘅推論工具；
– Stochastic就係指隨機嘅衝擊，亦即係模型要加入隨機因素嘅影響力；
– General則係指「整個經濟體」，配上Equilibrium就係指模型唔可以只處理單一市場嘅均衡（例如產品市場或勞力市場），而係要確保所有係模型之內提及嘅市場都達致均衡狀態（例如貨幣市場、產品市場同勞力市場要同時達致均衡，咁個模型嘅推論先算全面同完整。）
RBC因為利用完全靈活價格（flexible price）及完美競爭狀態（perfect competition）作為基本假設，因此主要結論係貨幣及財政策對經濟近乎毫無影響力，而經濟週期內嘅起落，則源自科技引入速度或生產力嘅隨機增減。
New Keynesian就係一個「改進」RBC不足嘅學術工程，引入壟斷型競爭（Monopolistic Competition）及Price Stickiness等 frictions（阻力），希望令DSGE模型嘅推論更接近現實。
New Keynesian嘅結論係貨幣政策對實體經濟至少有短期影響，而加入完善嘅貨幣政策規則（例如Taylor Rule），有理順經濟週期之能。
基本嘅New Keynesian DSGE模型會有三條算式。
第一條係Dynamic IS曲綫，IS係指Investment and Saving，作為實體經濟嘅決策嘅一個代稱。Dynamic IS曲綫係用黎反映實質利率（real interest rate）同Output Gap（即係實質量產與自然產能嘅差距）之間嘅關係；咁同一般嘅IS曲綫唔同嘅，就係加入左Dynamic嘅考量，即係「預期」呢個因素會直接影響到兩者嘅關係。
第二條係New Keynesian Phillips Curve，反映嘅係通脹同Output Gap之間嘅互動。基於Milton Friedman嘅教導，「預期」會令Phillips Curve左右移動呢個基本原則，當然有置入呢個模型之內。
第三條算式則為貨幣政策規則，用以決定模型內嘅名義利率（nominal interest rate），常用嘅就係Taylor Rule，指名義利率係會按Output Gap及通脹率製訂。
Dynamic IS曲綫與Taylor Rule放埋一齊，就可以得出一條總需求曲綫（AD），反映通脹與Output Gap嘅反向關係，再加上預計通脹及Output Gap具正向關係嘅Phillips Curve，就可以得出通脹及Output Gap嘅均衡水平。
參考資料：
https://www.aeaweb.org/articles?id=10.1257/jep.32.3.87
