Kevin係最新兩篇文章公佈左佢老師，芝加哥大學教授Casey Mulligan將會在下個月加入白宮嘅Council of Economic Advisers，成為Donald Trump嘅經濟顧問。
係呢個時候，正好同大家簡介下Mulligan係2015年推出嘅著作《Side Effects and Complications》。
呢本書講咩？
Mulligan教授係Obamacare草擬嘅初期，就已經對呢個醫保政策對美國就業市場嘅影響有疑問，而思考嘅基礎概念正係Obamacare內含不少「隱性稅」（Implicit Tax）。往後幾年Mulligan寫左幾篇詳細嘅研究（例如呢篇同呢篇），計算一系列隱性稅嘅成本，而呢本《Side Effects and Complications》就係將一系列研究整理而成嘅著作
本書我大約睇左一半，係學術角度黎講係一本上佳讀物，但從「消閒」角度就極為難讀，因為書中Mulligan非常仔細咁示範各項對就業隱性稅嘅估算方法。
老實講，書中採用嘅估算唔算好深，就算係個別情況要採用模型估算就業市場反應，啲模型都係偏向簡單。但就係因為書中幾乎係一浪接一浪嘅仔細分析同計算，個人而言就需要好多時間吸收，特別係我過往對Obamacare嘅細節都無大興趣，結果睇呢本書時要不停上網補習。另外，Mulligan基本上係以微觀價格理論黎為就業市場同失業率等問題把脈，呢一點唔多唔少，可能令平時偏向以宏觀學術理解就業問題嘅朋友（如我）有所抗拒。
對於一啲支持Obamacare政策願景嘅朋友而言，對呢本書嘅加抗拒會更大，因為書中描述嘅Obamacare係一個會令唔少低收入人士拒絕工作，令勞動參與率明顯減少嘅政策。
惟誠如Mulligan係書中多次指明，研究嘅重點唔係直接拒絕Obamacare，因為個研究對政策係醫護、居民生活及生命等得益，並無太多估算；但Mulligan嘅重點係要為大眾討論，提供更仔細嘅證據，了解政策嘅成本大約有幾大。
呢個正係此書值得睇嘅地方 — 細睇呢本書，你會學習到如何先仔細為政策嘅進行分析，再用證據評論政策。
