歐央行今年三月正式開始執行QE, 但因為之後出現希臘危機, 呢個歐洲史上首次QE變得無太多人留意。依家QE推行近半年, 而希臘問題又唔再搶眼(但其實仍然有很多新聞), 可以花啲時間睇一啲有關歐元QE嘅研究。

先同大家一齊讀一篇,黎自紐約聯邦儲備銀行的研究網誌Liberty Street的文章《Do Asset Purchase Programs Push Capital Abroad?》。呢篇文想討論嘅係歐元QE會唔會令資金大量流出歐元區,並且推高其他地區嘅資產價格。常見嘅講法係歐元區係QE之後債券回報被拉低,令到大量歐元資金湧去全球其他有更可觀回報嘅地方投資,咁就推高左第二啲地方嘅資產價格。

呢篇文嘅作者Thomas Klitgaard及David Lucca認為用基本經濟學理論推論,歐元區錄得資金淨流出嘅機會唔大。

佢地講嘅基本經濟學原理就係本網成日講嘅,在Balance of Payment(國際收支表)的基礎原則下,NCO(資金淨流出)出現嘅同時就必定要有等額的NX(淨出口)抵消,用一個較簡單的講法就係賣出每一元淨出口,就會賺到一元外幣,換個角度黎講持有一元外幣即係投資國外資產,即係一元資金淨流出。

將呢個關係放係歐元區之上,就即係QE要令到歐元區出現資金淨流出,其中一個前提係歐元區要有等接近等額嘅淨出口。睇歐元區嘅經常帳(Current Account,係觀察上述NCO最好的方法),係三月時的確較高,去到300億歐元,整體黎講QE前後幾個月嘅水平,都同2014年經常帳盈餘嘅水平差唔多,所以好難講到QE令資金大幅流出歐元區。

source: tradingeconomics.com

兩位作者就指出,係經常帳盈餘無明顯增長的前提,就算有歐元資金想流出去其他地方,同時亦都要其他地方有資金流入,先可以成事。否則,簡單嘅經濟學原理會講你知,大量淨流出會推低歐元匯率,歐元資金投資外地資產又會貴咗。

事實上,歐元區嘅資金流正正就係外流同流入一齊上升(下圖),即係當歐元資金湧出去,又有大量其他地區嘅資金湧返入歐元區,所以歐元資金提高其他地方資產價格,未必係一個合理講法。

資料來源:Do Asset Purchase Programs Push Capital Abroad?

The End


如果你覺得本網嘅文章有價值,強烈建議大家係 Google News follow 我地。
Econ記者亦正研發Substack Newsletter,不定期向各位發送我地嘅經濟學術及經濟時事討論文章。
Previous article英超、德甲同西甲,邊個「強弱懸殊」更嚴重?
Next article2/3遊戲 — 行為經濟學與投資理念

留言區

This site uses Akismet to reduce spam. Learn how your comment data is processed.