解讀聯儲局會議紀錄 – 縮減資產表嘅終局

之前寫左兩篇文講金融海嘯前同後嘅利率制度,收視好一般。相信好多讀者都唔明,無端無故做咩要寫啲咁技術性嘅文章。

事實係寫呢兩篇文,正正係為聯儲局12月嘅議息會議紀錄做準備,因為兩個利率制度之間嘅決擇,開始左右聯儲局係縮減資產表嘅決定。

金融海嘯前嘅聯儲局利率制度 – Corridor System

係2008年以前,聯儲局採用嘅利率操控制度係叫做Corridor System(走廊式),即係話個利率理論上可以係一個區域內上落;而個走廊嘅天花係Discount Rate(貼現窗利率),地板就係零息下限(Zero Lower Bound),聯邦儲備利率(Fed Fund Rate)理論上可以係呢兩個利率之間升跌上落。