Econ記者 10 月, 2018刊出嘅文章

Phillips Curve（菲利浦曲線）為一個講述失業同通脹率之間關係嘅理論，簡單而言就係講失業率同通脹率具反向嘅關係，前者升就後者跌，反之亦然。但其實50年代面世以來，Phillips Curve有眾多版本，而不同版本背後除左係經濟學者對通脹失率嘅了解多左，亦與不同年代各個宏觀經濟學界嘅主流思想同技術嘅轉變有關。以下就係會作一個簡單解述。 先講下歷史，呢個理論嘅起源要由1958年係論文《The Relation Between Unemployment and the Rate of Change of Money Wage Rates in the United Kingdom, 1861–1957》講起，Phillips Curve係按呢篇研究嘅作者William Phillips而命名，佢係呢篇研究提出英國失業率與薪酬通脹，係統計上具穩定嘅反向關係： 第一代Phillips Curve - Keynesian 之後兩位頂級經濟學者 Paul Samuelson 及 Robert Solow 將呢個理論套用係美國嘅數據上，寫成《Analytical Aspect of Anti-Inflation Policy》 一文。兩位發現相似嘅統計關係同樣出現係美國，並將失業同薪酬增長率嘅關係進一步演繹為失業與物價通脹嘅關係，將上述嘅統計現象推廣成為「提高通脹可減低失業」嘅經濟政策建議： 兩位就按上圖嘅Phillips Curve「餐單」指出，如果美國要維持通脹係2.5%或以下，失業率就要維持係5-6%；如果要失業率低至3%，咁美國就需要忍受4-5%嘅通脹率。而自從Phillips Curve亦融入左Keynesian宏觀經濟理論之中，作為解釋通脹嘅機制。 第二代Phillips Curve - Accelerationist 到60年代尾，Milton Friedman及Edmund Phelps先後提出新理論，指Phillips Curve並非經濟定律，只為一個短期經濟現象；高通脹只係短期內令居民更積極消費，但長綫而言就只會令居民將通脹預期提高。呢個新嘅思想就創建出所謂Accelerationist (或者Expectation Adjusted) Phillips Curve，用數式表達是咁的： 按Friedman嘅理論指，經濟中有一個自然失業率（u*），取決於整體生產力同資源；Friedman認為Phillips Curve推斷嘅失業與通脹反向關係，實際上係取決於失業率同自然失業率嘅差距，當失業率低於「自然」，通脹率就會上升。 不過，係Friedman嘅建構內失業率（與自然失業率之間嘅關係）只係其中一個因素，另一個決定性因素係前期通脹率。理論係，前期嘅通脹率會慢慢變成居民嘅通脹預期，例如見當見到過往幾年嘅通脹都係2%，2%通脹就變左基本預期；若果幾年嘅通脹都係10%以上，居民就傾向預期通脹率繼續係10%以上。 係呢個情況下，失業率對通脹嘅影響力只係添加係通脹預期之上；以高通脹政策降低失業率嘅話，就會令通脹預期上升，當通脹預期高左，要令失業減低就要更高嘅通脹率；如此類推，呢個所謂嘅「降失業政策」長遠而言只會令通脹加速，但最終失業率亦無法低於自然失業率。以圖表顯示就係咁嘅： 通脹預期上升會令Phillips Curve向上移（由PC0變成PC1），但失業率長遠而言都有傾向回到自然失業率（U0）嘅水平；持續將失業率推向U1只會令通脹率（直軸）愈黎愈高，即係通脹率加速，呢個亦係點解第二代Phillips Curve係叫「Accelerationist」。 第三代Phillips Curve - New Keynesian 70年代嘅滯脹引證左Friedman嘅理論，令Accelerationist Phillips Curve成為學術上嘅主流。不過70年代中期嘅理性預期革命（Rational Expectations Revolution），進一步改變學術上Phillips Curve。 首先係Real Business Cycle（RBC）理論之中，Phillips Curve再唔係右向下斜綫，因為貨幣因素係呢個理論框架內唔會可以影響到實體經濟，無論通脹幾高幾低都好失業率都不會受影響；即係，Phillips Curve係理論上係直綫。 去到90年代，宏觀經濟學界慢慢放棄RBC呢個「貨幣無效」理論，改為採納所謂嘅New Keynesian框架 ，並重新引入右向下斜嘅Phillips Curve。 New Keynesian Phillips Curve反映嘅仍然係反映通脹率同Output Gap（大約等於失業同自然失業率嘅差距）之間嘅互動；同Friedman版本唔同嘅地方，係通脹預期唔再只係基於前期通脹率，而係基於理性預期，即係居民綜合對政策因素嘅理解而產生嘅預期，相對較具前瞻性（雖然模型內仍然可用前期通脹作為通脹預期嘅推斷因素之一）。呢個亦係現行較為常見嘅Phillips Curve框架。 回歸原點？ 值得留意係，兩年前係文章《美國Phillips Curve回到六十年代？》就提過Olivier Blanchard嘅研究指出，數據顯示 Phillips Curve慢慢變返去60年代的版本，即是某個通脹水平大約對應一個失業率水平，而再非70年代的Accelerationist Phillips Curve，通脹預期建基於前期通脹，推高通脹的代價就是令通脹愈來愈高，而失業率則不太回落。 即係話聯儲局可以盡力推高通脹，就可以能令失業率降低，並唔太需要擔心通脹加速！至少，個理論係咁講。 本網與Phillips Curve相關文章 Phillips Curve與通脹的形成 美國Phillips Curve回到六十年代？ – 跟耶倫學宏觀經濟學研究 美國的Phillips Curve有幾斜？ – 跟耶倫學宏觀經濟學研究 Phillips Curve唔係直綫 – 失業率愈低通脹將會加速嘅理論 香港嘅Phillips Curve是咁的…… 甚麼是自然失業率—NAIRU？

Monthly Archives: 10 月 2018

咩係Phillips C...

經濟學者係科企有咩做？

美國經濟

美國就業報告：4月非農就業仍見顯著增長

英國經濟

英國春季預算 – 工黨政府與OBR沒完沒了嘅fi...

加拿大經濟

加拿大4月失業率：6.9%

經濟學

咩野係SDR – Special Drawing Right?

按揭抵押證券（MBS）同金融海嘯有咩關連呢？

咩係Circular Flow of Income？