Econ記者Blog 主題文章結集

周二公佈嘅12月美國PPI通脹數據（PPI for final demand）顯示，按年嘅升幅為3.3%。 但其實PPI 係反映啲咩架呢？ 我諗大部份朋友都有個概念，就係佢同CPI唔同，顧名思義，CPI係consumer price index 就即係睇消費者面對嘅價格，咁producer price index就當然係將個角度轉成生產者收到嘅價格。呢個理解係100%正確。 美國PPI 係咪計「批發」價格? 咁但係唔少人都會有另一個感覺，就係PPI其實係批發（Wholesale）價格指標，因為總之就係零售之前嘅一層啦，同CPI比較量度零售（Retail）層面價格作一個對比。 其實現時唔少美國大型媒體時常採用PPI係反映批發價格嘅講法。不過用喺美國呢個講法就頗有問題。 要留意美國BLS（勞工統計局）2014年左右採用左一個叫FD-ID方法去處理PPI數據。你留意到上面講PPI數據時我講係PPI for final demand？ FD就係final demand，而文首講嘅「PPI通脹」，就係呢個新聞通常首先會報嘅PPI-FD。 Final demand就係指生產者將啲產品或服務賣俾人作為資本投資、政府投資、出口與及個人消費之用時收到嘅價錢。你無睇錯，個人消費價格係其中一個PPI-FD會計及嘅內容之一。換個講法，PPI-FD計算嘅方向係美國本地生產商提供產品及服務予C、I、G及X（四個用expenditure approach計GDP時會見到嘅分類）使用時收取嘅價格指標。無M（入口），就係因為只睇本地生產商。 喺呢個建構下，你見到佢唔係講緊批發零售之別，因為佢有包括直接供應予個人消費開支嘅價格，而係如上述所講，佢係由生產者嘅角度睇價格嘅轉變，而佢更加唔指計個人消費，亦包括左其他經濟入面嘅開支層面，某程度可以話係一個更廣嘅角度去睇價格嘅改變。（只不過央行嘅角度，佢只係需要理個人消費者所面對嘅價格。） 為左確保我嘅睇法正確，我去信BLS查詢過，佢地亦都確認左PPI指數「do not only reflect “wholesale inflation”」（唔只反映批發通脹）。 而BLS用左11月比較搶眼嘅雞蛋價格（單月升左54.6%）黎解釋。呢個蛋價格指數計嘅係當隻蛋賣俾個人消費、資本投資、政府投資及出口等用途時，生產者收取嘅平均價格，「過程中可能佢地會先賣左俾好似批發商或者零售商呢啲中間人，再較售予最終使用者。」換言之，PPI-FD可以係批發商支付嘅價格，可以係零售商俾嘅價錢，甚至可以喺使用者直接俾嘅價錢，總之個角度係由生產商出發，佢地收幾多就計幾多。 相對而言，CPI計算嘅係由消費者角度睇，佢俾左幾多錢黎買一件產品，呢個價會包含左消費稅，亦會包埋件貨運到去間鋪俾你買嘅運費等等。但呢兩者都係唔會計入PPI，因為對生產者而言呢兩項都唔係佢會收到嘅錢。 當大家講開「批發」層面，另一層嘅意思可能係「一個較前嘅生產步驟」。 PPI係有包括呢方面嘅數據，BLS用嘅係FD-ID方法入面嘅ID就係Intermediate Demand，即係當生產者賣嘅野，會成為另一個生產者嘅生產材料，就會計入PPI-ID呢條數。 ID有大兩計法，一個係按產品分類（processed goods、unprocessed goods及services），而另一個就係按生產步驟作分類成stage1-4，最初步嘅例如原油開採價格就係stage 1；而stage 4就係賣俾人去生產啲野俾Final Damend，例如貨車生產就係一個例子。 其實呢啲FD-ID內容每份PPI新聞稿都有解釋，詳情大家可以去睇下再了解下。 PPI同通脹嘅關係 另一個問題係，PPI同通脹走勢上有幾大關係呢？Richmond Fed嘅研究員係2022年做過個簡單研究，個結論就係如果用PPI-ID stage 4同PCE價格（留意，係PCE唔係CPI）指數一齊睇，兩者嘅相關性好高，長遠而言係會齊上齊落，而如果有偏離嘅話，我地應該預期個分叉之後會收窄。 PPI同PCE物價指數亦有一個更為直接嘅關係，就係美國BEA（經濟分析局）會直接使用唔少PPI數據作為input去計算PCE（詳情可見該局嘅NIPA Handbook）。亦因此，唔少分析員都係用PPI（與及CPI）嘅細項數據，去估算當月嘅PCE物價數據，令準確度高啲。 原刊於本網Patreon，大家有興趣經呢個platform贊助我地嘅工作。

Econ記者Blog

Dr.Strangelove — 一套...

邊個城市嘅人要係返工時間睇世界盃…？

非農人口估算大幅下調、聯儲局7月會議紀錄

呢隻牛有幾重？群眾智慧真係估到

John Nash 係個點嘅Professor?

Krugman 與Blanchard 暢談宏觀經濟...

聯儲局對自然利率從未咁「迷惘」

PPI — ...

香港理論上可以用外匯儲備...

香港嘅Phillips ...

想「左膠」變右？其實唔難...

Powell 話時辰到就...

Dr.Strangelo...

美國經濟

聯儲局主席2025年Jackson Hole演說 ...

英國經濟

點解Reform黨引述移民財政負擔數字錯左？因為佢假設全部...

加拿大經濟

加拿大7月錄疫情以黎最大就業減幅

經濟學

Comparative Advantage？我識啊!

按揭抵押證券（MBS）同金融海嘯有咩關連呢？

甚麼是Lemon Market？信息不對稱理論？逆向選擇？