周四聯儲局理事Chris Waller上左Bloomberg TV接受專訪，大標題當然係佢示意7月前改變貨幣政策嘅機會唔大。
- 講7月，係因為Trump對所謂嘅「對等關稅」定下嘅90日暫緩大約會去到7月頭。
- Waller嘅意思就係關稅及其對經濟嘅影響，係90日暫緩談判有結果前都唔會有大變，而聯儲局應該等到下半年睇埋個關稅真正嘅程度先會作出反應。
不過，我想聚焦嘅係Waller對聯儲局主席一職明顯有少少野心呢個題目。
訪問入面其中一條問題，就係「有人會覺得你上星期篇演說，好似同聯儲局主席Jerome Powell嘅講法有啲分歧喎？」
佢上星期篇演說就係採用左情境分析（scenario analysis）去講聯儲局應該點應對關稅帶黎嘅經濟影響：
1） 如果關稅之後返到去4月2日本來嘅「對等」關稅水平，咁佢就相信經濟衰退嘅壓力會好大，可聯儲局就應該擔心就業市場多於通脹問題，特別係需求下降甚至可以有壓通脹嘅效果，所以係呢個情境聯儲局可以較放心去減息。
2） 另一個情境就係關稅最終只係討價還價嘅工具，最終大約平均關稅只會大約係10％左右，喺呢個情況下反而聯儲唔洗急於減息，可以耐心觀察先再行動。
無錯啦，就係上述1號情境遠較Powell堅持重申「等多陣」嘅立場為進取。
要知道一件事，就係當又傳出Trump想炒Powell時，傳聞嘅替代熱門就係前聯儲局理事Kevin Warsh；不過Waller其實都係半冷門人選，WSJ嘅「聯儲局傳心師」Nick Timiraos 都多次用 「被分析員視為潛在人選」黎形容Waller，所以問佢係咪同Powell有分歧正係針對呢點。
佢個答案都無令我失望，佢話「呢個咪無groupthink（人云亦云）嘅好處，大家可以有對經濟同貨幣政策唔同嘅睇法！」之後再補充「都有人話我講嘅野同Powell兩日後講嘅一樣喎」，然後話都係俾大眾判斷返同主席有無分歧啦。
值得提返大家，上次聯儲局議息有一票反對，就係Waller投架啦，仲要佢唔係反對息率水平，只係反對QT速度放緩一點，係相當少有嘅反對票用法。係咪用黎示意自己同現時嘅聯儲局主流有所不同，我就不得而知啦。
而真正「見工」題目，就係佢點睇Trump對Powell嘅批評，佢嘅答案包括「我就唔理呢啲，只專心睇數據。」「被人批評係聯儲局工作一部分，唔想嘅就唔好做呢份工」「總統，同其他人一樣，想點批評都得。」再加上「央行獨立好重要，我自己都研究左呢樣野20年」，同埋「最緊要係，下位主席，不論係邊個，可唔可以保護央行獨立，呢個個係重要嘅。」
初輪「見工」算係咁啦。
如果講影子聯儲局主席，Trump有無興趣揾佢做？最少佢現盛已經有票在手又有牙力，你俾Warsh做佢除左「嘴炮」仲做到啲咩？Trump自己噏咪得囉？
