法院判司法部對聯儲局傳召無效 惟大龍凰繼續上演

最後更新日： 2026年03月14日

美國聯邦法院判定司法部對聯儲局及該局主席Jerome Powell嘅大陪審團傳召無效。

• 個判詞都好直接，講明覺得今次司法部嘅行動，係向聯儲局施壓以求迫使佢地應總統Donald Trump嘅減息要求。

然後，非常之「震撼」嘅係主理呢單案嘅司法部檢察官Jeanine Pirro馬上開左個記招，大鬧呢單案嘅法官 James Boasberg係「activist judge」（其實應該係譯左翼激進法官），而個判決令Powell可以「bathed in immunity」（呢個應該譯「沐浴喺額免權之中」？）。

• 最重要嘅係佢講明會就呢個裁判上訴。

點解上訴係個大問題呢？就係因為Kevin Warsh嘅聯儲局主席及理事提名，要去到參議院投票之前，首先要過到該院嘅銀行委員會確認。

• 咁目前13:11嘅共和黨對民主黨分佈；而早已經公佈左唔會喺今年中期選舉尋求連任嘅共和黨議員Thom Tillis，喺Powell受傳召嗰一刻就講明，一日司法部繼續呢個「損害央行獨立」嘅檢控調查，佢就唔會投票過過Warsh（或任何新聯儲局主席）嘅任命。咁個票數就卡死喺12:12度

原來見到今日個判決都以為Warsh有望可以適時入到聯儲局理事會同5月就任主席。

• Tillis 亦即時出左個X推文話判決證明呢個檢控調查係「nothing more than a failed attack on Fed independence」（對聯儲局獨立嘅失敗攻擊）

• 仲講明叫司法部唔好上訴，否則只會拖延Warsh入局。

但結果依家決定上訴，好大機會Warsh喺5月之前都入唔到聯儲局，情況相當「有趣」。