Hassett做聯儲局主席嘅話 夠唔夠票去減息？

最後更新日： 2025年12月04日

美國財長Scott Bessent今日出席New York Times嘅論壇時，一如預期咁唔肯確定Kevin Hassett 係咪將會成為下任聯儲局主席。但佢有一句話令我諗左一陣： 

“The chair of the Federal Reserve has the ability to move and start the discussion, but at the end of the day … he or she is one vote.” 

即係下任主席邊個都好啦，都只係FOMC（聯儲局嘅公開市場委員會，即係投票決定加減息嘅委員會）入面其中一票；聯儲局係咪可以持續減息都仲要睇其他官員嘅投票取態。

呢句野當然從來都係真啦，但近一個月對聯儲局會唔會喺12月減息嘅討論，特別係一眾區域聯儲銀行群起反對減息嘅後，市場最後都深信今個月會減息嘅呢個動態，其實都反映左主席嘅獨特重要性。

點解區域聯儲銀行嘅反抗都阻唔到減息？

簡單講就係唔夠票。

以下就係我借用人稱聯儲局傳心師嘅WSJ記者Nick Timiraos早前嘅聯儲局官員投票取向估計。可以見到嘅係今次19位官員應該有6位有減息傾向，唔想減嘅就有9個，其餘包括主席Powell及副主席Jefferson在內嘅其餘4位目前係「唔明確」，未有披露傾向。

7名聯儲局理事
Jerome Powell	主席	唔明確
Michelle Bowman	金融監管副主席	減
Philip Jefferson	副主席	唔明確
Lisa Cook	理事	唔明確
Michael Barr	理事	唔減
Chris Waller	理事	減
Stephen Miran	理事	減

五名有票嘅區域聯儲銀行總裁
John Williams	紐約聯儲銀行	減
Susan Collins	波士頓聯儲銀行	唔減
Austan Goolsbee	芝加哥聯儲銀行	唔減
Alberto Musalem	St. Louis 聯儲銀行	唔減
Jeffrey Schmid	Kansas City 聯儲銀行	唔減
無投票權嘅聯儲銀行總裁
Beth Hammack	Cleveland 聯儲銀行	唔減
Neel Kashkari	Minneapolis聯儲銀行	唔減
Lorie K. Logan	Dallas聯儲銀行	唔減
Anna Paulson	Philadelphia聯儲銀行	減
Tom Barkin	Richmond聯儲銀行	唔明確
Raphael Bostic	Atlanta聯儲銀行	唔減
Mary Daly	San Francisco聯儲銀行	減

係呢個角度，唔減（9位）嘅聲勢絕對係遠比想減（6位）嘅聲勢為大；如果「中立」嘅意思係「邊一多人就投嗰邊」，咁就會係減息嗰邊會贏。

但依家利率市場嘅推算係有90%嘅機會減息，預測市場 Kalshi 就預期94%機會減息。原因有兩個：

1） 反對嘅人主要係地區聯儲銀行為主，但12個聯儲銀行總裁只係得5位有議息投票權
2）手執永久投票權嘅紐約聯儲銀行總裁John Willaims示意會支持減息

呢個正正反映區域聯儲銀行喺個制度限制下影響力偏低，就算講緊可能係12個有8個傾向要求維持利率不變，都似乎係改變唔到減息嘅情況。

紐約聯儲銀行總裁又因為制度設計上係聯儲局主席外嘅另一權力核心，正常而言Williams會同主席Powell立場一致。假設主席同紐約總裁企同一陣綫，並進而推算部份未表態嘅官員都會「跟著主席走」，按此推算的話「減息」嗰邊就會以 7-5 贏啦。

當然啦，上述個投票意向都只係按演說及訪問內容估出黎，未必百分百準確；再者佢地嘅傾向亦未必同最終嘅投票決定一樣，因為聯儲局仍然係一個「共識為上」嘅組織，喺「以和為貴」嘅前提下個別唔想減息嘅官員都可能唔介意係輸梗嘅情況下減少反對票數量。亦即係，呢個7-5比數只係一個粗略嘅參與。

唯一可以肯定嘅係，市場對減息預期相當強，聯儲局唔會係無必要嘅情況下製造驚喜。

轉成Hassett有無唔同？

喺呢度，我想抽返出黎討論主席一票嘅重要性。

上述嘅分析好明顯係一個主席會係最終決定者嘅情況。因為就算喺呢個聯儲局內有明顯意見分歧嘅前提下，Powell可以憑藉佢對一班立場無咁強烈嘅「親信」去為今次議息一槌定音。

問題係Hassett上場嘅話，個情況仲係咪咁呢？假設絕大多數區域聯儲銀行對減息嘅取態都仍然係偏向抗拒的話，Hassett 又可唔可以好似Powell 咁用多數票「壓倒」呢啲反對聲音呢？

首先，假設佢只能拎返依家由Stephan Miran坐緊嘅理事位置，亦即係假設Powell 退任主席之後唔會辭任理事，咁個投票取向大約都係會同依家差唔多。

但要留意，12月嘅會議之後FOMC就會轉由另外四位區域總裁持有投票權，一個分別就係Philadelphia聯儲銀行嘅Anna Paulson似乎係比較唔介意減息（至少目前呢一刻係），即係可以多一票。

五名區域聯儲銀行總裁
John Williams	紐約聯儲銀行	減
Beth Hammack	Cleveland 聯儲銀行	唔減
Anna Paulson	Philadelphia聯儲銀行	減
Lorie K. Logan	Dallas聯儲銀行	唔減
Neel Kashkari	Minneapolis聯儲銀行	唔減

但之後要考慮嘅係Lisa Cook嘅情況。除左Trump政府可否直接用按揭文件問題指控去免除Cook嘅理事任命（呢個問題喺一月會再經最高法院審理）之外，Cook會否因此對親Trump嘅Hassett嘅領導較有保留令新主席少左一票理事票，都係頗值得觀察。

另一個情況就係Powell決定五月離開聯儲局，咁首先會俾Trump政府多一個理事任命機會，然後亦會令到佢地取得理事會大多數（即7個理事有4個由Trump委任）。除左喺FOMC會議多左一票永久票之外，另一個「好處」就係理事會大多數理論上有權隨時喺無「合理原由」下炒任何一位區域聯儲銀行總裁。呢個權力真係應用嘅話可能會有頗大嘅市場震盪，所以如非必要都未必會用，但亦可能會對各聯儲銀行總裁帶黎無形嘅壓力，或者多多少少令佢地同Hassett合作多少少……？

總結

總結就係，如果去到Hassett5月上任之時美國經濟都仲維持住好似依家咁，就業市場仍然偏弱，而通脹仍然未回到2%嘅話，我會覺得Hassett要主導FOMC投票方向會有少少難度；但如果Powell願意同時離開理事會嘅話，Hassett 就會比較容易處理會內嘅反對聲音。