英國7月CPI通脹率：3.8%

今日英國ONS（國家統計局）出左7月嘅CPI通脹數字，結果按年升幅加速到3.8%；核心通脹率（即係扣除能源及食品價格）亦都係按年升3.8%。

對按年升幅貢獻最大嘅係包括能源價格在內嘅「住屋及水電撚氣」嘅升幅，一個主因仍然係上年4月個電費跌得好多，個基數效應令去年10月同今年4月個升幅對按年數字嘅影響更大。

但就算當呢個電費波動唔存在，食品價格同包括娛樂文化、餐飲酒店及交通在內嘅幾個服務價格嘅按年升幅都仲係幾勁下（見下圖，各個主要分類對按年通脹率嘅貢獻）。

食品及非酒精飲品價格係一個頗值得留意嘅一項，除左因為同喺英國生活嘅朋友息息相關之外，亦都係英倫銀行上次貨幣政策告入面重點分析嘅一項。幾個重點就係，除左因為入口食品價格有上升壓力（例如可可豆及咖啡豆）之外，本土因素亦包括超市及食品製造業等嘅人工隨著National Insurance 嘅供款提高及最低工資上升等因素而增加，令個食品價格有持續上漲嘅壓力。

同一時間，服務通漲按年計升緊5%，高過英倫銀行預計嘅4.9%。其實英倫銀行近幾個月都試下改用一個扣除四十幾個「較波動」嘅服務業細項嘅服務通漲指數去睇個走勢，而按ING嘅分析員嘅計算個指數係跌返少少嘅，咁都算係好啲嘅消息。

再者，睇返按月升幅個通脹又唔係話真係咁差，只係升左0.1%（核心就升0.15%）。只不過上年7月，個按月升幅係-0.4%，所以只係0.1%嘅按月升幅都仲可以推高個按年數字。

分開個貢獻黎睇，最最最重要嘅只係交通價格。而講到尾就係因為機票價格喺一個月升左30.2%，但ONS 都講到明呢個應該只係一個數據收集嘅時間問題所致，意味之後會「正常」返。

不過，英倫銀行都預計個整體通脹率會升到9月先會開始回落（因為上年10月個電費上升效應會離開個按年數字嘅計算範圍），最多會升到去4%。喺食品及服務通脹轉趨頑固下，英國嘅朋友仲要挨多陣。