提早安放「影子主席」？ 拆解下任聯儲局主席須一月入局原因

今朝（美國時間6月30日）美國財長Scott Bessent接受Bloomberg訪問，除左講快將要係參議院表決嘅稅務法案，亦有講到聯儲局下任主席嘅問題。其中一點，係回應上星期WSJ 講Trump政府會早於9月就公佈「下任主席」人選，成為所謂嘅「影子主席」嘅報道。

其實WSJ呢個理解方法雖然無錯，但同時都不必要地太強調「影子主席」呢一點，而Bessent今日就提供左另一個理解角度。

記得我地之前喺Trump可以點去「改造」聯儲局嘅拆解文章入面提到，Jerome Powell嘅主席任期會喺2026月5月15日完結。但主席首先要係一位聯儲局理事，而Powell嘅理事任期到2028年1月底為止。所以，如果Trump政府打算喺Powell主席任期完結後再放一個下任主席入去，首先要Powell會喺主席任期完結後離職；另外，呢個新主席會接手Powell手上餘下嘅理事任期，咁即係去2028年1月底就又要再提名佢做理事一次。呢個就係Bessent講到嘅問題啦。

2028年1月，連Trump呢一屆嘅總統任期都未完；同時，就算佢地信心有幾大都好，到時已經過左中期大選，共和黨手執參議院多數嘅現況可能有變，令下任主席有機會喺上任一年左右就又要去國會拎（理事）提名，而且好有機會出事令呢位新主席無得做（再重申「主席首先要係一位聯儲局理事」），戰略上好唔理想。

另一個選擇，就係現任理事Adriana Kugler嗰位。之前都提過，雖然佢只係2023年9月13日上任，但正正因為佢拎嘅係前任未完成嘅任期，所以佢個理事之位去到2026年1月底就完，需要再接受提名。咁Trump政府當然唔會再提名佢；而又由於呢個理事職位會成為一個全新嘅14年任期，Bessent就指將下任聯儲局主席放入呢個理事位，係更理想嘅策略。

呢度就睇到點解話會喺9月至10月提名接任人，因為一個理事嘅國會提名過程需時三至四個月係好正常（例如Kugler自己嘅提名過程就用左大約四個月），二月上任嘅話就俾四個月左右去做提名，咁就大約係9月至10月。因此，「影子主席」策略（即係早啲講明邊個做下一任，再希望早啲影響政策）雖然可以係考量之一，但我相信呢個理事委任策略嘅安排更加係9月/10月呢個時間表背後主因。

另外，不論市場定分析都假設Powell會喺主席完結後離任。事實我覺得大家都太理所當然，我仍然覺得有一定機會Powell會選擇留任理事，做我之前講所謂嘅「逆向影子主席」（Reverse Shadow Fed Chair）；特別要留意，Powell根本未講明佢會點做。

咁嘅話，其實除左Kugler之外，Trump根本無理事空缺可以放入去做主席。因此保險嘅做法就一定係用Kugler嗰位放入下任主席之選，而「影子主席」會係一個Bonus。