無錯! 雖然關稅加完又減，但係實體關稅仍然好高，特別係對中國嘅125%「對等」關稅率仍然生效，加上20%嘅 Fentanyl 關稅等等。問題係，仲未係數字上睇到關稅收入大增。
- Trump月初曾經講過每日收到嘅關稅高達20億美元，咁呢個梗加喺數據上睇唔到啦。
其實美國財政部有份Daily Treasury Statement講返每日美國政府嘅收支估算，當中列出每日關稅收入數字。
目前最新嘅數字去到4月22日，如果將財政年度開始（上年10月1日）至今嘅數據同早兩個財年比較（下圖），你會見到三月起個累計關稅收入雖然多過之前，但個分別唔算話好大…… 直至22號。
- 大家都見到呢個每日收入數字，每次去到月尾就會出現一日彈升，令到個數據好似梯級咁。
- 咁係因為唔少入口商會用海關嘅Periodic Monthly Statement找數，只需要喺下個月嘅第十五個工作天前一次清付整個月嘅關稅欠款。亦因此，每月大約20號左右就會有一大筆關稅入帳，形成圖中嘅「階梯」。
- 今個月22日就係第15個工作天，入帳嘅關稅單日高達116.8億美元，當中應該絕大部份為3月嘅關稅。
如果用整個月計，4月去到22日嘅關稅收入為154億美元，高過3月成個月嘅96億美元（其實單係4月22日一日已經高過）。將154億除開25日（當只計工作日），日均大約6億美元左右。
但因為4月2日先開始超高關稅政策，又因為月結的話要下個月第十五個工作天先要找數，都要去到大約5月21日左右先真係睇到個效果。
