最後更新日： 2025年12月11日
12月議息結果
聯儲局再減息— 救就業較壓通脹重要
聯儲局一如預期咁減息四分一厘，利率目標區間降至3.5-3.75厘。
雖然事前聽到好多反對聲音，但今次「只有」三票反對：一票黎自理事Stephan Miran，一如以往要求減半厘；兩票希望唔好再減，分別芝加哥聯儲銀行嘅Austan Goolsbee 同Kansas City 聯儲銀行嘅Jeff Schmid
Dot Plot亦顯今次會議事實上一共有6位官員唔想減息，亦即係應該仲有4位無票嘅聯儲銀行總裁會投反對票（但無票）
聯儲局（全稱聯邦儲備局，Federal Reserve）為美國嘅中央銀行，工作主要為制定貨幣政策同維持金融系統穩定。
聯儲局嘅建構
聯儲局理事會就係包括主席（現為Jerome Powell）、兩名副主席及另外四位理事所組成嘅七人委員會，為聯邦儲備制度入面嘅核心管理組織，成員都係由總統提名及參議員委任，坐喺首都華盛頓主理聯儲局嘅主要職責。七位理事嘅委任權，就放喺美國總統同國會手上 — 總統提名人選，然後交予參議院通過。
- 每一個理事席位有一個長達14年嘅任期，而呢個任期係跟個位而唔係跟人。而如果理事初上任時係頂手一個未完嘅任期，規例上佢可以做完該任期後再拎一個完整嘅14年任期。以現任主席 Powell 為例，佢2012年12月加入聯儲局理事會，拎嘅係一個2014年1月底完結嘅任期。佢喺2014年5月先成功經國會通過拎到新一個14年任期，到2028年1月底為止。
- 聯儲局主席之位則有一個四年任期，而主席首先要係一位理事，只要佢仍有理事任期在手，仍然期內就可以「無限期」連任主席。 Powell現時嘅第二屆主席任期2022年5月開始，據當時嘅公告係會去到2026月5月15日完結。
- 現時聯儲局制度亦設有兩名副主席，一位係幫主席處理貨幣政策為主，另一位就負責主理金融規管事務。前者（理事會副主席）由Philip Jefferson出任，後者則由Micheal Barr擔任。兩個副主席任期同主席一樣，都係四年一任，但唔一定會喺總統任期中期完結，相對「彈性」較大。
理事會以外就係12間區域聯儲銀行。
而理事會加上區域銀行主席就組成所謂嘅FOMC（公開市場委員員），主理貨幣政策。理事會嘅七位成員與及紐約聯儲銀行嘅總裁長期有貨幣政策投票權，其餘四票就由餘下11位區域聯儲銀行總裁就每年輪替取得投票權。
2025年嘅FOMC投票成員名單
| 7名聯儲局理事 | 任期 | |
|---|---|---|
| Jerome Powell | 主席 | 主席: 2026年5月; 理事：2028年1月 |
| Michelle Bowman | 金融監管副主席 | 副主席：2029年6月；理事2034年1月 |
| Philip Jefferson | 副主席 | 副主席: 2027年9月; 理事：2036年1月 |
| Lisa Cook | 理事 | 2038年1月 |
| Michael Barr | 理事 | 2032年1月 |
| Chris Waller | 理事 | 2030年1月 |
| Stephen Miran | 理事 | 2026年1月 |
| 五名區域聯儲銀行總裁 | |
|---|---|
| John Williams | 紐約聯儲銀行 |
| Susan Collins | 波士頓聯儲銀行 |
| Austan Goolsbee | 芝加哥聯儲銀行 |
| Alberto Musalem | St. Louis 聯儲銀行 |
| Jeffrey Schmid | Kansas City 聯儲銀行 |
| 無投票權嘅聯儲銀行總裁 | |
|---|---|
| Beth Hammack | Cleveland 聯儲銀行 |
| Neel Kashkari | Minneapolis聯儲銀行 |
| Lorie K. Logan | Dallas聯儲銀行 |
| Anna Paulson | Philadelphia聯儲銀行 |
| Tom Barkin | Richmond聯儲銀行 |
| Raphael Bostic | Atlanta聯儲銀行 |
| Mary Daly | San Francisco聯儲銀行 |
之前聯儲局相關報道
12月4日：區域聯儲銀行反對聲音 難阻聯儲局再次減息
自上次議息會議之後，從各官員演說及訪問內容可以見到,絕大多數嘅區域聯儲局官員都反對連續第三次減息。但市場仍然堅信今次會議將會再次調低目標利率,點解?
原因有兩個:
-
反對嘅人主要係地區聯儲銀行為主,但12個聯儲銀行總裁只係得5位有議息投票權
呢個正正反映區域聯儲銀行喺個制度限制下影響力偏低,就算講緊可能係12個有8個傾向要求維持利率不變,但最終可能只係FOMC入面12票入面嘅4票反對,未必改變唔到減息嘅情況。 -
手執永久投票權嘅紐約聯儲銀行總裁John Willaims示意會支持減息
紐約聯儲銀行總裁又因為制度設計上係聯儲局主席外嘅另一權力核心,正常而言Williams會同主席Powell立場一致。假設主席同紐約總裁企同一陣綫,並進而推算部份未表態嘅官員都會「跟著主席走」，就會令減息成為大多數票嘅選擇。
閱讀全文
10月30日：聯儲局再減四分一厘息 局內反對12月再減嘅聲音漸壯
聯儲局於10月30日決定再減四分一厘息，利率目標區間降至3.75厘至4厘。而喺記者會嘅開場白，主席Powell講明FOMC內部對12月減息與否，有「Strong differing views」（不同強烈嘅意見），減息並唔係一個預定嘅決定。
聯儲局嘅責能
貨幣政策
貨幣政策方面，美國國會喺Federal Reserve Act入面授予聯儲局嘅政策目標就係所謂「dual mandate」（雙重職責），一方面要維持物價穩定（stable prices）同埋「全民就業」（maximum employment）。
- 正如喺聯儲局呢篇解說指出，其實Federal Reserve Act 仲講左「moderate long-term interest rates」呢個目標，但要為一般相信物價穩定就可以達至長綫利率處於適度水平，所以就將兩長合而為一。
通脹目標
喺2012年1月，聯儲局就將每年2%嘅PCE物價指數升幅，定性為與「長綫物價穩定」一致嘅通脹水平。
- 亦因此，分析員都會採用扣除能源及食品等較易波動嘅價格作為所謂嘅「核心PCE價指數」，藉以簡單量度通脹趨勢（underlying inflation）。
去到2020年1月，聯儲局就開始採用俗稱「flexible average inflation-targeting（FAIT，即具靈活性嘅平均通脹目標）」定義長綫2%通脹，即當通脹低於2%一段時間後，就會容許通脹高過2%一段時間以令平均通脹達到2%。
- 喺呢個框架下，該局並無訂明可以接受通脹偏離2%幾多與及幾耐，亦即係唔知到個「平均」係幾長嘅時間，所以被視為有容許通脹率短期高於2%嘅傾向。
喺2025年8月底，主席Powell公佈最新嘅長遠貨幣政策框架，並正式取消左FAIT；通脹政策目標回歸2020年以前嘅設定。
就業目標
全民就業方面，聯儲局亦係無定明任何數字目標，只強調會採用多個唔同嘅經濟指標去判定所謂嘅理論上最高就業水平同埋失業人數會唔會係太高。
聯儲局最主要嘅貨幣政策工具為利率政策。
金融穩定
聯儲局成立嘅一個重要目的，就係要確保美國嘅銀行系統安全，防止大型嘅銀行倒閉危機。而貼現窗借貸（discount windows）呢類Lender of last resort（最後貸款人）機制，確保資產表健康嘅銀行可以喺市場恐慌時取得央行給予嘅流動性援助，為聯儲局多年來一個重要嘅金融穩定體制。
喺2008年金融海嘯後，美國國會通過俗Dodd-Frank法案就要求聯儲局採用Macroprudential（宏觀審慎）政策，因此該行就開始推行包括年度Stress Test（壓力測試）同埋流動性要求等嘅金融政策。
其他責任
另外，該行網站亦列明聯儲局亦有執行與制定金融監管規則、確保美國支付體制有效且安全及保障消費者金融產品方面嘅利益呢三大責任。
其他聯儲局相關討論
聯儲局官員任命機制
Trump第二任內「改造」聯儲局空間有幾大？ | Econ記者
美國總統可唔可以炒聯儲局主席呢？ | Econ記者
聯儲局主席就算唔連任仍可留係FOMC – Yellen的例子 | Econ記者
聯儲局嘅利率控制
金融海嘯前 – Corridor System & 金融海嘯後- Floor System
點解聯儲局將個RRR減到零？ | Econ記者
本網內容全數由Patreon嘅讀者贊助
如果你都鐘意我地嘅文章，可以考慮成為我地最新嘅Sponsor !
想睇到我地最新嘅文章，可以去Telegram follow 我地 詳見《Econ記者使用說明》
