今個星期三加拿大央行又再議息，但討論已經唔係會唔會再減多次息。減，係一定架啦，問題係會唔會減半厘。依家個預期似係相信佢會減半厘，例如六大加拿大銀行入面，有五間話嘅報告估將會減息半厘，唯一話25點子嘅TD都戴定頭盔話「係一個close call」。
呢個半厘預期有兩大觸發點。首先，當然係聯儲局早前減左半厘息，其次就係上個月嘅通脹率跌穿2%嘅央行目標。
係呢個減息周期入面，加拿大央行行長Tiff Macklem一直都強調，加國嘅利率當然可以同美國嘅分離， 但個重點係「直至某一個水平」（To a certain extent）。個邏輯簡單，美加兩地嘅經濟基礎唔同，實體經濟嘅走勢亦不盡一致，咁兩國嘅利率水平當然唔需要完全一樣啦。
但又因為兩國嘅經濟關係緊密，資金流動又極為自由，兩地嘅利率大方向又應該要相似。所以，由於現時加國經濟較美國疲弱，加拿大利率可以理解為 (聯邦儲備利率 – 某個差距)。大過呢個差距，就會出現資金流走，加幣過弱等嘅問題。
不過，係唔知個合理利率差距係幾多嘅前提下，呢個論述係無咩內容嘅。不過其中一個含意就係：當聯儲局減半厘，咁加拿大可以減嘅空間咪大左囉，亦可以減息減得快啲囉。
另一點就係，如果加拿大個經濟相對更差，某程度上亦令加拿大需要一個更低嘅利率 — 即係個利差亦都可以大少少。咁其實都唔洗如果，因為加拿大個經濟真係差過美國好多，睇下個人均GDP增長比較就知。
咁你問我同唔同意要減半厘？
我個人嘅偏好係比較保守，覺得如非必要減四分一厘係足夠架啦，只係需要向市場保證減息會陸續有來（即係做一啲forward guidance）便可。另一個問題係，因為美國經濟太好，市場對聯儲局減息嘅預期低左，較長期嘅息率都升返上去。咁呢個情況就令兩者較長綫嘅息差拉開左（例如圖中嘅美加五年國債息率比較），呢個情況分叉嘅走勢可唔可以持續呢，我係有疑問嘅。
問題係有無啲咩數據可以幫到加央行去力排市場上嘅眾議，唔去減50點子？ 目前的確係少嘅，上面提到唯一偏向支持減四分一厘嘅TD，佢地就指勞動市場仍然強韌係一個支持點。例如，加國嘅時薪增長仍達按年4.6%，唔算太差。我亦都想指出加國7月嘅零售銷售錄得按月0.7%嘅增長，都係一啲近來少見嘅亮點，但夠唔夠真係見仁見智啦。
