加拿大失業率點解升得咁快？

開返個Patreon之後，其實想寫多啲有關加拿大同英國經濟嘅野。無他嘅，一下子呢兩個地方同我近左，我想知多啲。之前試過好似即時新聞咁寫，但又發現咁追法有啲困身之餘，我又真係未培養到讀者興趣（即係無咩人睇），所以我想轉成慢啲寫抽離少少嘅分析。呢類讀者比較易消化（我估）。

今次想講下加拿大嘅失業問題。失業率其實近一年升得頗幾快，由年初嘅5.7%升至8月嘅6.6%。之前報道過幾次加國就業報告，我都會出呢一張款圖比較當月Statistics Canada 嘅人口、勞動人口同就業職位嘅增長速度估算。因為我覺得如何消化人口增長明顯係呢個國家面對嘅一個大難題，所以用呢個圖黎了解下個發展動態。

8月失業率急升至6.6%

例如，8月個失業率點解急升0.2個百份點？好簡單，因為勞動人口嘅增長（加8.25萬人）遠高過就業增長（2.21萬）。步入勞動市場但揾唔到工，就會變成失業人口。咁中學經濟科都教過，只要分子失業人口嘅增長比例（喺8月為4.14%）高過分母勞動力增長嘅比例（僅為0.38%），失業率就會升。

呢個圖嘅缺憾係雖然可以一次睇到晒係人口、勞動力同就業增長之間每個月嘅「賽跑」，但唔係太清楚人口轉化成勞動力同失業人口嘅比率。

2022年後人口急增224萬

一個簡單嘅解決方法，係試下睇2022年以黎（亦即疫情初步退卻，經濟開始調整復甦之時）人口、勞動人口與及就業人口嘅累積。

2022年初至今年8月期間，StatCan嘅Labour Force Survey估算人口增長一共為223.5萬人，高達7.1%嘅增幅；而勞動人口增長則為近138萬人，升幅6.7%。

係上圖大家都見到個動態。2022年初期勞動力增長（灰綫）係高於人口增長，亦即係部份因為疫情唔再揾工嘅人重回就業市場。而更厲害嘅係，就業增長喺上年中之前，唔單只係可以跑贏勞動力增長，更加可以跑得快過人口增長。

問題係，人口嘅爆發性增長一路無停過，而喺通脹高企，引致利率愈黎愈高嘅環境之下，職位增長根本唔可能一直同人口增長並行。更甚嘅喺，職位增幅喺2024年開始放緩，4月起更接近横行。

喺呢個時間，另一個轉捩點出現：2022年以黎加入勞動力嘅人數，開始高過職位總增幅。換言之，用呢個計法睇，4月開始新加入勞動市場嘅人好多最後都只能夠加入失業大軍。呢個亦都係點解近幾個月，不倫加國央行定係各大新聞媒體都多左討論年輕人同新移民需要好長時間先揾到工、甚至都仲係揾唔到工嘅問題。

新增勞動力急變失業人口

只係用呢啲2022年後嘅增長數字計，「失業率」（即總新增失業人口對勞動人口總增長比率）首次喺4月變成正數，去到8月已經高達8.9%。

另一個勞動市場冷卻嘅指標，係2022年後嘅「勞動參與率」（即勞動人口總增長對總新增人口嘅比率）愈黎愈低。當然，由於2022年初期唔少人因為疫情回落而重投勞動市場，所以令呢個比率喺初期高過100%。個比率喺去年底回落去頗正常嘅水平，大約70%以上。但去到8月只係得返60%左右。

呢度反映嘅問題，我相信唔少喺新移入人口（入面可以包括working visa、permenant resident持有人之餘，亦可包含左只能有限度工作嘅student visa）都可能面對難以融入競爭愈黎愈大嘅加拿大勞動市場嘅問題，而唔太積極投入揾工。

惟值得留意嘅一點係，StatCan有公佈為新永久居民嘅勞動參與率估算。近五年先得到永居身份嘅人口，其實算係勞動參與率特別高嘅人口組別，喺8月個參與率高達79%，遠高過加國整體嘅65.1%。傳統黎講，永居人點解會特別需要工作？ 因為首先定居一個新地方亦需要資金，等拎永居前嘅一兩年可能都用左唔少存款，令資金需求相對緊張；同時移居人士數常正值壯年，亦係揾真銀嘅年紀。問題係，近半年呢個特高嘅參與率只能轉變成特高嘅失業率，8月嘅數字高達12.3%。

等錢洗又好、壯年都好，想要一份工都要面對愈黎愈大嘅競爭。而我相信唔少移居加國嘅朋友都可以講你知，就算加拿大政府話未來會大幅削減非永居移入人口嘅增長，佢依家都仲係消化緊移入人口嘅處理嘅backlog。又例如今年7月加國央行嘅Monetary Policy Report都調整過佢地模型嘅人口估算基礎，覺得人口增速減慢嘅速度唔會好似該行之前估計咁快，所以人口增速方面都仍有一段時間先可以解決。

可以點解決？

咁點算？加國央行嘅諗法係，減息能醫此病。喺該行嘅論述框架入面，加拿大經濟面對嘅問題為「供過於求」（Excess Supply）— 勞動力過多為其中一個過多嘅「供」。減息，佢認為可以刺激到消費需求上升同埋住室投資增長，咁就可以令人均GDP重回增長。

得唔得？ 我當然唔知啦，但我多多少少有啲覺得央行喺magical thinking。不過本文已經太長，有時間另文再述。