過去24小時，有兩件比較重要嘅事:
首先係朝早美國勞工統計局（BLS）公佈今年三月嘅非農就業人口估算指標數字；
另外就係聯儲局公佈7月底會議嘅紀錄。
BLS每年都會喺大約呢個月份，整合佢稅務數據去計一個非農就業人口估算指標，用作之後修訂全年非農數字嘅基礎。今年呢個暫時嘅指標就指出，3月時嘅非農職位總數應該要較之前就業報告顯示嘅數字下調81.8萬個職位。
下調嘅幅度，係高達職位總數嘅0.5%。BLS指出，過去十年嘅調整平均只為約0.1%，所以個幅度毫無疑問係「誇張」。問題係，咁有咩問題？
因為今次指標估算覆蓋嘅時段係2023年4月至2024年3月，所以一個量化嘅方法就係如果呢12個月少左一共81.8萬份工，咁大約每個月嘅非農增長係幾多。喺呢12個月非農職位一共增長左290萬個，除開就係少於24.2萬個一個月。如果減左81.8萬個職位，就即係只有208萬個職位左右，除開就係一個月平均只有17.4萬個。
咁就見到一個問題啦，24萬個非農增長係一個相當可觀嘅數字，唔夠18萬個就一個「相當健康」嘅數字。
當然啦，依家講返2023年4月至2024年3月呢段時間，重唔重要? 一個常見嘅諗法係係經濟原來無咁強勢；另一個重點就BLS嘅估算誤差的確係嚴重左，毫無疑問會令之後嘅政策溝通難左。
講開政策溝通，我地就可以講呢個數字同聯儲局會議紀錄嘅交叉點。其實今次估算指標會出現大幅調整，係一個市場預計左嘅事；事實上，分析係預計左上100萬嘅下調，所以係「好過預期」。而喺7月30同31日嘅會議入面已經有討論過呢個問題:
“…many participants noted that reported payroll gains might be overstated, and several assessed that payroll gains may be lower than those needed to keep the unemployment rate constant with a flat labor force participation rate.”
「Many」（多位）官員認為非農數字有高估情況， 「several」（幾位）認為就業增幅喺勞動參與率橫行嘅時況下，根本係唔夠足以令失業率唔再上升。所以呢個調非農就業估算下調嘅情況，已經一早喺聯儲局嘅考量入面。
所以個數字會唔會令聯儲局急左減息，減多啲？我唔認為呢個數字足夠令聯儲局嘅睇法有任何改變。
