ONS 星期五公佈嘅零售銷售數字係按月跌1.2%,跌幅頗大。
單單睇呢個數字會見到自然會覺得係經過第一季同第二季初段嘅穩步增長之後,經濟開始回軟。
可能係嘅。但我地睇返數據會見到,零售量按月變幅,其實又再一次出現左三個月大升之後大跌嘅情況:
![](https://i0.wp.com/econreporter.com/wp-content/uploads/2024/07/ukretailsalesjune20241259929149845787649.jpg?resize=696%2C432&ssl=1)
上一次係11月開始,當時都寫過「唔少英國人將去百貨公司購物、買衫買玩具送禮呢批聖誕消費行為,推前左係十一月(例如Black Friday)時進行」,令11月有高達1.4%嘅顯著增長。
不過之後就令12月嘅零售量減少,見到-3.2%呢個我所謂嘅「衰退級」數字。然後呢?就係1月數字再反彈,高達3.4%嘅月度增長。
今次嘅開端就倒轉,先係4月嘅1.8%跌幅,然後5月就反彈至2.9%增長,再之後就6月嘅1.2%回落。
可以見到,近期英國零售數字都係有一個頗誇張嘅波幅,但我仲未見到太合理嘅解釋。但又升又跌之後,第二季嘅季度增長按季跌0.1%,唔係太差亦唔係太亮麗。