美國PCE物價指數同之前報嘅CPI數字一樣，顯示嘅係5月份按月通脹為0%（多幾個小數位就會見到係-0.008%）
- 而核心通脹亦都非常低，只有0.083%
喺呢個温和嘅按月升幅下，整體PCE物價嘅按年升幅回落至2.6%。而核心亦都2.6%，為2021年3月以黎最低。
將按月通脹數字拆開成五份，可以見到食品嘅貢獻為零，而能源及核心貨品分別都係拉低通脹嘅。換言之，全部正數貢獻都係黎自扣除左能源服務價格嘅核心服務價格。
核心服務我地又已經分成兩份：住屋同埋扣除左住屋嘅超核心服務。
住屋嘅貢獻為0.07%
- 過去一年其實住屋嘅貢獻一直都係0.06%至0.08%呢個局間入面上上落落
- 用返指數升幅睇，按年升幅5.54%，繼續緩慢嘅減速；按月則為0.42%，繼續喺0.4%左右橫行，走勢頗為頑固
扣除左住屋同能源嘅服務價格走勢就相對理想
- 對整體月通脹升幅嘅貢獻喺5月只為0.05，較再之前兩個月嘅0.21%同0.14%明顯放緩。
- 呢個所謂超核心服務自己嘅按月升幅亦都只係0.1%，按年升幅都跌到去低過3.4%，2023年12月以黎最低。
所以目前見到嘅呢個通脹回落係由服務業價格升幅放緩帶動。值得留意係核心服務今個月入面，包括左0.7%嘅醫護服務按月物價升幅，如果唔計呢個特別高嘅升幅，整體按月通脹會低0.12個百分點。
服務業帶動價升幅放緩，某程度都支持呢排較多人講嘅「消費放緩而通脹減速」嘅局面。
值得留意係，個人消費開支只係按月增長由4月嘅0.136%微微回升至0.248%，同之前常見嘅0.5%或以上相距頗遠，都可以用黎支持呢個講法。
