英國5月嘅CPI按年升幅終於達標跌到2%，絕對係值得開心
但咁係咪代表英倫銀行會係周四減息？
- 其實首先一件事，就係英倫銀行係7月4日大選之前，無論CPI 係幾多，減息嘅機會都係相當細，因為真係唔爭在等多個月，以避免有幫執政黨助選嘅感覺（雖然就算一次減夠一厘都唔會助到保守黨幾多…）
不過，如果我地返去純講數字，其實都仲係同英倫銀行嘅預期差少少
- 係英倫銀行5月嘅貨幣政策報告，其實5月嘅預期係1.9%整體通脹
- BoE都講左好耐，受惠能源價嘅下跌英國通脹係會於今年中跌到去2%左右，問題係之後會因為能源相關嘅基數效應會係下半年消失，通脹率會回升返一段時間。
- 例如佢其中一個估算就係整體CPI升幅會係7月上到2.4%。
更加值得擔心嘅係服務業通脹率。5月嘅服務業通脹係5.7%
- 但英倫銀行嘅預期係5.3%。
- 連同4月嘅5.9%，就係連續兩個月高過預期0.4個百份點。你由下圖都睇到，兩條綫相距甚遠。
- 服務業通脹係BoE最重視嘅通脹細項，因為最能夠反映到本土需求與及薪酬升幅對物價嘅影響，而呢個數據相信完全唔會令該行放心。
順帶一提，5月租金升幅為按年7%，較4月嘅6.9%有所反彈，都係另一個會令央行擔心嘅通脹走勢。
其實之前英倫銀行行長Andrew Bailey係唔少對外講話，都令我覺得佢好想快啲減息一次，所以我原先預期6月係可以減息。不過，首相辛偉誠突然公佈大選，Bailey為首嘅一眾央行官員就取消晒所有公開演說活動，我地無法進一步睇到佢有無改變諗法。亦如我文首所講，大選臨近而數據又未太如預期，咁不如等多一陣，8月1日嘅會期先減都未算太遲。
