加拿大央行星期三宣佈減息25點子，將隔夜利率目標下調至4.75厘
- 現時聯儲局嘅目標利率區間為5.25-5.5厘，所以美加嘅利率差距依家變成0.5至0.75厘。
係記者會嘅開場白入面，加央行行長Tiff Macklem提到「如果我地對通脹回落至2%嘅信心持續增加」，可以預期該行會進一步減息。
“If inflation continues to ease, and our confidence that inflation is headed sustainably to the 2% target continues to increase, it is reasonable to expect further cuts to our policy interest rate. But we are taking our interest rate decisions one meeting at a time.”
不過，Macklem都係記者會多次強調，進一步減息嘅決定要視乎未來嘅數據，亦即係同上面最後一句所強調「每個議息會議再決定」，亦即係該行目前唔想劃定一個減息路綫圖。
Macklem列出左幾個支持減息嘅經濟因素。
- 首先，加拿大經濟目前處於「供過於求」（excess supply）嘅狀態。最明顯嘅例子係勞動市場，壯年人口嘅增長高於就業增長，亦因此職位空缺持續減少。
- 另外，通脹回落情況理想：1) 整體通脹喺4月回落至2.7% ；2) 加央行嘅核心通脹指標降至約2.75%左右；3) 經年化嘅三個月核心通脹升幅更加低過2% ； 4)喺CPI計算入面，升幅高於3%嘅細項比已經返回歷史正常水平。
上述種種都令加央行覺得利率政策唔再需要咁緊（”We don’t want monetary policy to be more restrictive than it needs to be”），亦因而開始減息。
