美國PCE通脹4月維持2.7%升幅

美國PCE通脹4月維持喺2.7%不變；而核心通脹就維持喺2.8%，三個月不變

• 不過你睇下面呢個圖，兩條數都唔係打橫架喎？
• 因為用個index自己計，用三個小數點睇就會見到，整體通脹由2.703%降至2.655%，核心通脹就由2.813%減至2.754%，都算係「可觀察」嘅減幅。

睇返按月升幅，整體通脹係0.3%而核心則為0.2%

• 好煩咁我地又係要睇三個小數點。我本身只係睇2個小數點，但因為核心嘅升幅係0.249%，兩個小數點就變成0.25%，睇唔到點解會係BEA講嘅0.2%……
• 再講多次，年增長2%，就即係平均每個月只可以升0.165%左右。核心0.249%嘅升幅同0.165%仲有一段距離……

就算係咁，個核心嘅按月升幅的確係低左，亦足夠令經年化嘅三個月升幅回落至3.5%。

扣除左住屋同能源價格嘅服務業通脹按年升3.4%，按月升0.3%

• 喺圖入面都見到，呢個所謂嘅超級核心通脹嘅按年升幅持續橫行，呢個頑固性對聯儲局嘅減通脹行動黎講，係一個好難解決嘅問題
• 但樂觀少少嘅係，經年化嘅三個月升幅由5.4%跌返去3.6%，算係有啲進步。

另一個頑固嘅細項就係住屋成本

• 4月嘅按年升幅降至5.64%，係持續見到回調
• 按月亦減至0.41%，微微低過3月，但仍然算係頗高。

總結

由以上幾項睇，個結論同4月嘅CPI通脹數據差唔多，都係相對第一季嘅高通脹時期有所改善，但仍然需要多一啲「耐性」去睇下今季係咪可以持續見到通脹減速，定係會維持係呢個高水平橫行。