美國3月就業報告仍然強勁! 首先，非農就業職位增加左30.3萬個。
- 1月嘅職位增長上調左2.7萬個﹐就算2月數字下調左5,000個，兩者加埋都仲係升左2.2萬
- 三個月平均嘅非農增長亦因此繼續加速，升至27.6萬個。（下圖紅綫就反映緊三個月平均增加數字正在加速）
- 下圖都標示左，2010年代嘅每月平均非農增長數字為18萬左右，咁比較就見到依家個走勢係幾咁強勁。
失業率
失業率亦同時由2月回落0.1個百分點至3.8%。
勞動參與率
3月最新數字嘅數字係升至62.7%（2月為62.5%）；
- 如果只計壯年人口（即25至54歳），參與率就反而微微回落至83.4%（2月為83.5%）
工均時薪增長率按年為4.14%，按月則升0.35%。
- 呢一個數字已經步入左平穩嘅水平（見下圖橙綫）
總結
我諗你都已經睇得出，呢份報告都好明顯反映緊，美國就業市場就算唔係熾熱，都一定係「非常健康」。然後個問題就會係，咁點解仲要減息呢？你有咩需要「拯救」呢？
講多一句就係，我目前覺得Powell同聯儲局其他成員其實做緊兩個工作： 主席一路要強調「我覺得減息三次嘅預期仲係正路」，同時多個官員講「可能唔洗減」或者「我覺得減一兩次就可以」，呢個係聯儲局嘅風險管理方法，目標係長綫利率唔好再好似上年咁大上大落。
目前個形勢的確係似減三次太多，但Powell 同其他官員兩個方向嘅言論，係可以將個預期拖長慢慢反映，而唔係每出一次數字就長綫孳息急升急跌﹐用依家至六月呢段時間，俾個市場慢慢消化到唔會減三次嘅「事實」。
